Россия Федерациясынынъ билимлендируьв тармагына билим сапатын биргелес тергеви аьр заманда да маьнели болады эм мектеблерге бар маьселелерди аянламага, ата-аналарга оьз саьбийлерининъ билимининъ сапатын билмеге демевлик этеди. Орта ортак билимлендируьв программасынынъ тамамлав кезеги – сырагылар келтиретаган аттестация.
Биргелес патшалык сынавлар (ЕГЭ эм ОГЭ) мектебтинъ выпускниклери кайдай билим алганын коьрсететаган алатлар деп саналадылар. Быйыл ЕГЭ оьткеруьвге аьзирлик шаралар озгарув мезгилде Ногай районынынъ билимлендируьв учреждениелери Савлайроссиялык «Ата-аналар ман Биргелес патшалык сынавларды оьтуьв» акциясында катнасканлар. Бу шарадынъ борышы – ата-аналарды сынавлар оьтуьв барысы ман таныстырув. Ногай районында ЕГЭ-2022 йогары уйгынлав дережеде оьтти, правобузувлар йок эди. Сынавларда катнасувга 105 аьдем регистрация оьткенлер.
Сынавлар оьтуьв мезгилинде баьри амаллар да алынды эм тутылды, классларда видеонаблюдение амаллары, телефонлардынъ ислетуьвин токтатув алатлары салынган. Быйыл сынавларда 100 балл алганлар йок, болса да 42 окувшы йогары баллар алганлар. Ногай районынынъ мектеблерининъ 13 выпускниклери алтын медальлерге тийисли болдылар – Рамазан Эдильбаев, Карина Салемиева, Ислам Джумаев (А-Х.Джанибеков атындагы мектеб), Сафира Абдулмусаурова, Айбике Рамбердиева, Амин Атангулов, Аделина Махмудова, Карина Мансурова, Суюмбийке Янгишиева (Кадрия атындагы мектеб), Милана Эсиргепова (Нариман авыл мектеби), Абдулкерим Искаков, Диана Кульниязова (Калинин авыл мектеби), Айгуль Менглиязова (Бораншы авыл мектеби).
Орыс тили бойынша сынав баьри выпускниклерге де парызлы деп саналады, орта билим акында шайытлама алув уьшин бу сынавды бермеге тийисли. Йогары баллар бу сабак бойынша Бораншы, Карагас, Куьнбатар, А-Х.Джанибеков атындагы, Кадрия атындагы, Червленные Буруны эм Эдиге авыллар мектеблерининъ выпускниклери алдылар. Профильли математика бойынша районда 28 выпускниклер сынав бердилер. Энъ де йогары баллар Айбике Рамбердиева, Фазиль Муратказиев алдылар. Быйыл 40 окувшылар обществознание сабагы бойынша сынавды сайладылар. Ийги коьрсетуьвлер бу сынав бойынша Абдулкерим Искаков, Аминат Капитуллаева, Алина Алимгазиева, Рамазан Эдильбаев, Ислам Джумаев, Азиз Аджимуллаев бердилер. Химия сабагы бойынша быйыл 34 выпускниклер сынавлар бердилер. Йогары баллар Дамир Куванаев, Айбике Рамбердиева, Амин Атангулов алдылар. Физика бойынша быйыл сынавды 6 выпускниклер бердилер, адабиат бойынша – 2, тарих сабагын 16 выпускниклер сайладылар. Йогары балл Рамазан Эдильбаев (96), Камилла Боранбаева (87) балл алдылар. Информатика эм ИКТ бойынша ийги коьрсетуьвлер Исмаил Межитов, Сулейман Арсланов, Фазиль Муратказиев бердилер. Быйыл биология бойынша сынав 33 выпускниклер бердилер, английс сабагы бойынша – 3.
Курал айдынъ 19-ншы куьниннен алып тамбыз айынынъ 22-нши куьнине дейим ГИА сынавлары берилди. Баьриси 252 окувшылар бу сынавды беруьв уьшин регистрацияланганлар. Орыс тили бойынша район бойынша билим сапаты 98,6 процент болды. Математика бойынша билим сапаты 89,6 процент, обществознание бойынша – 94, 6 процент деп белгиленди. Баска сабаклар бойынша билим сапаты осал тувыл.
ЕГЭ оьткеруьв иси район бойынша выпускниклердинъ ыхтыярларын тутув аьлде оьтти. Ногай районынынъ мектеблерининъ етекшилерине тийисли талаплавлар берилди – 2023-нши йылда ГИА оьткеруьв бойынша шаралар планын туьзбеге, окытувшылардынъ билимин оьстируьв ниет пен шаралар планын аьзирлемеге, осал коьрсетуьвлер беретаган окытувшыларга коьмек этпеге, 2023-нши йылда озгарылаяк ЕГЭ аттестациясын аьзирлев эм озгарув соравлары ман ата-аналарды, 11-нши классынынъ окувшыларын таныстырмага, 10-ншы классынынъ окувшыларынынъ арасыннан осал окыйтаганлар ман, алтын медаль алмага болатаганлар ман куллык юритпеге, йогары коьрсетуьвлер беретаган окытувшыларды уьлги этпеге, выпускниклерде эм ата-аналарда патшалык аттестациясына ийги карав туьзбеге.
А.Агаспарова,
Ногай районынынъ Билимлендируьв боьлигининъ етекшиси.
Суьвретте: выпускниклер сынав беруьв мезгилинде.
