Тоьгерек якты саклав Савдуныялык куьни (Эколог куьни) 5-нши июньде коьп эллерде белгиленеди. Бу байрам сол куьн белгиленетаганы да босына тувыл: 1972-нши йылдынъ 5-нши июнинде ООН ман тоьгерек як маьселелери бойынша биринши кере специальлик конференция озгарылган.

Россияда Эколог куьнин токтастырув эм оьткеруьв табиат саклав ман байланыслы баьри дережели оькимет учреждениелердинъ, оькиметлик тувыл экологиялык организациялардынъ эм табиатты эм тоьгерек якты саклавга себеплигин тийгистетаган баьрининъ де кеспилик аьрекетлигининъ маьнелигин белгилейди. Бу куьнди экологлардынъ эм табиатты саклавшылардынъ кеспилик байрамы эсабында белгилев РФ Президенти В.В.Путиннинъ Указы ман (21 июль 2007-нши йыл, №933) токтастырылган. Ол, «Эколог куьни» деп аталып, Оькимет Думасынынъ Экология бойынша комитетининъ баславы ман токтастырып, белгиленип басланган.
Эколог куьни – Табиат ресурслар министерствосынынъ, Табиат саклав прокуратурасынынъ, Табиат пан пайдаланув департаментининъ куллыкшылары, солай ок баска оькиметлик эм байыр экологиялык организациялар уьшин кеспилик байрамы.
Экспертлердинъ баалавы ман, Россияда тоьгерек якты саклав тармагында оькимет власть органларында эм федераллык оькимет учреждениелеринде, халк хозяйствосынынъ туьрли тармак предприятиелеринде эм табиатты саклав ман байланыслы буйымлар толтырув тармагында – 200 мынънан артык экологлар, табиат саклав ман байланыслы илми эм илми-билимлендируьв учреждениелерде – 60 мынънан 100 мынъга ювык специалистлер кыйын саладылар, а орта кеспили эм йогары окув ошакларда окыйтаганлар эм аспирантлар саны 40-45 мынъ аьдемге дейим етиседи. Россияда миллионлаган гражданларды бириктиретаган 1000 артык ямагат экологиялык организациялар да аьрекет этедилер.