Карагай, елка тереклерди законсыз шабувдан саклав мыратта быйылдынъ декабрь эм 2022-нши йылдынъ январь айларында Ногай орманлык хозяйствосынынъ, муниципаллык туьзилислер аькимбасларынынъ эм Ногай районынынъ ыхтыяр саклав органларынынъ биргелес куьши мен район еринде бир неше шаралар озгарув планланады.
Ногай район еринде карагай тереклер – ол Червленные Буруны авылынынъ кубыла ериндеги кумлакларда оьсетаган реликтовый арша орманлыклар. Аьдеттегиндей, Янъы йыл байрамлары алдында бу ярасык тереклердинъ законсыз шабылувы артады. Орманлык хозяйство куллыкшылары бу баалы терек оьсимликлерин сакламага кереклиги, орманлык законодательствосын бузганы уьшин яваплыкка тартылмага болаягы акында яшавшылар арасында анълатув куллыгын юритедилер.
Карагай тереклерди саклав мыратта Янъы йыл алдында Ногай орманлык хозяйствосынынъ баьри куллыкшылары ман бирге ыхтыяр саклав органлар куллыкшылары, ерли самоуправление органлар ваькиллери, солай ерли яшавшылар уьйкен куллык юритееклер. Кеше-куьндиз рейдлер озгарылаяк. Ногай РОВД ГИБДД куьшлери мен карагай тереклер эм бутаклар алып бараяткан автокоьликлер тергелееклер.
Оьзлерин тегин эсабында янъыйыллык елка ман суьйиндирмеге токтаскан гражданлар законга коьре тийисли дембиге йолыктырмага болады. Законды тутпай, карагай тереклерди шабув ман байланыста куьнали деп белгиленген аьдемлер гражданлык-ыхтыяр, административлик яде уголовлык яваплыкка тартыладылар: гражданлар – 3,5 мынъ маьнет акша, етекши ис орынлардагылар – 30 мынъ маьнет акша, юридический лицолар – 100 мынъ маьнет акша эсабында штраф тоьлемеге тийислилер. Оннан баска болып, браконьер аьр шабылган терек уьшин келтирилген зыянлык уьшин де тоьлемеге керек. Эгер законсыз шабылган терек уьшин сол аьдемнинъ тоьлемеге кереклиги 5 мынъ маьнет акшадан артса, ол РФ УК 260-ншы статьясы бойынша уголовлык яваплыкка тартылады.
Район гражданларына Янъы йыл алдында бизим табиатка зыян келтирменъиз деп шакырув этемиз.
Баьринъизди де келеяткан Янъы йыл байрамы ман ак юректен кутлаймыз. Наьсип эм ийгилик сизинъ аьелинъизге!
Ногай орманлык хозяйствосы.
