Навруз байрам – Ер юзинде бурынъгы байрамларынынъ бириси. Ол янъы яшавдынъ басланувын белгилейди. Туьрли халкларда ол туьрлише айтылады, биревлер наврузды «янъы куьн», баскалары – «байрам» деп айтадылар.
Навруз – халк байрамы, ол табиаттынъ янланувы ман, йылы куьнлер келип, кырларда авылхозяйстволык куллыклар басланувы ман байланыслы деп белгили.

Ногай районынынъ баьри авылларында да навруз куьни байрамшыланады. Соьйтип, район орталыгы Терекли-Мектеб авылында байрам кызыклы болып оьтти. Маданият меканы алдында терме салынган, иши онъайлы болып ерлестирилген, туьрли ногай аслары ман ногай шай келген конакларга деп аьзирленген.
Келгенлерди яркын язлык байрам ман Дагестан Республикасынынъ Халк Йыйынынынъ депутаты Мурзадин Авезов, «село Терекли-Мектеб» СП МО аькимбасы Зейдулла Аджибайрамов шыгып кутладылар. Шара барысында «Хош келдинъ, навруз!» театраллык коьрсетуьви, «Меним халкымнынъ йырлары эм биювлери» концерт программасы, туьрли миллет ойынлар, сарынлар, юмаклар конкурслары озгарылды. Авыл администрациясы эм маданият куллыкшылары ман уйгынланган байрамда авыллардан да маданият куллыкшылары келдилер, концертте катнастылар. Конкурсларда катнаскан аьр бир аьдемге савкатлар тапшырылды.
Куьннинъ мунълылыгына карамастан, навруз байрам кызыклы болып оьтти.
Бизим хабаршы.
Суьвретте: байрамнан коьринис.