Ясларымыз спорт тармагында бийик етимислерин коьрсетип, енъуьвши орынларына тийисли болып келетаганы аьр кайсымызды да суьйинтпей болмайды. Спорт пан кызыксынув – ол тек деннинъ савлык кебин сайлап калмай, алдына салынган мырадына адымнан-адым шыдамлыгы ман етисуьв. Енъуьв – бириншилердинъ сырасында болув тувыл, ол алдынгыдан коьп кере ийги болув болады.

Соьйтип, ногай ясымыз Нурадил да яшавын спорт пан бала шагыннан байланыстырып келеди. Ол 1995-нши йылдынъ кырк кийик айынынъ 15-нши куьнинде Бабаюрт районынынъ Геметюбе авылында тувган. Ол яс болса да, буьгуьнлерде коьплеген ярысларынынъ енъуьвшиси болады.
Ногай яс Нурадил Биймурзаев Дагестаннынъ сегиз кайта чемпионы, 2012-нши йыл тренери Ахмед Ахмедовтынъ етекшилиги мен ол Братиславта 16-17 ясындагы яслар арасында Дуныя бириншилигинде енъуьвши болды. 2019-ншы йыл Самара каласында кикбоксинг бойынша Россия чемпионатында ез призеры, сол ок йыл Сургут каласында кикбоксинг бойынша Урал федераллык округынынъ чемпионы болды. 2020-ншы йыл элимиздинъ бас каласында Николай Королевтинъ эстелигине багысланып оьткен «А» класс боксы бойынша Савлайроссиялык мастерлер турниринде енъуьвши болып шыккан. Оннан сонъ ога Россиядынъ бокс бойынша спортынынъ устасы деген сыйлы аты берилген.
Янъыларда Нурадил Биймурзаев Екатеринбургта оьткен Урал федераллык округында кикбоксинг чемпионатында «фулл-контакт» кеби бойынша етимисли куьрести. Ярыстынъ тамамлары бойынша савлай Уралдан элимиздинъ чемпионатына 400 кикбоксерлары айырылган эдилер. Ярыстынъ тамамы бойынша яс Нурадил Биймурзаев алтын медалине тийисли этилди. Урал федераллык округында спорттынъ кикбоксинг кеби бойынша чемпионы атына тийисли этилди. Сол етимиси ногай яска уьстимиздеги йылдынъ коькек айынынъ 25-нши куьниннен 30-ншы куьнине дейим Барнаул каласында уйгынланып оьтеек Россия чемпионатында ортакшылык этпеге амал берди.
Яс спортсмени Нурадилге сол ярысыннан да енъуьвши болып кайтканын йорап, аьли де алдыда бийик етимислер сагынамыз.
Г.Нурдинова.
Суьвретте: Нурадил Биймурзаев.