Руслан Сыдыйык увылы Муталимовтынъ артында –Ногай районы бойынша налог инспекциясында, Дагестан Республикасы бойынша Сайлав комиссиясында, буьгуьнлерде Ногай районы бойынша «ДР-сы бойынша МФЦ» етекшиси ис орынында.
Эр кисиге алпыс йыллык мереке –яшавынынъ тамамын келтиретаган заман, ама бу яшав еринде катып калатаган заман тувыл. Аьдем оьз алдына мыратлар да салады, оьзининъ ниетлери де болады. Соьйтип, уьстимиздеги йылдынъ август айынынъ 7-нши куьнинде белгилеек Руслан Сыдыйык увылы Муталимов та ойлайды.
Бу куьнги мерекеши Ногай районынынъ Червленные Буруны авылынынъ бек коьримли, абырайлы аьеллерининъ бириси Сыдыйык Савкатович пен Оразбийке Байманбетовнадынъ аьелинде тувган. Онынъ яслыгы да, балалыгы да оьзининъ тенълериннен баскаланмайды. Аьелде уьш кыз, эки кеде болып оьстилер. Олардынъ ата-анасы аьр бир баласына тийисли тербия берип, янларына суьйикли кеспилер алдырмага бек уьйкен куьш салганлар. Бу куьнлерде баьриси де эл арасында сыйлы аьдемлер.
Червленные Буруны авыл орта мектебин 1979-ншы йыл кутарганнан сонъ, Ставрополь каласындагы политехнический институтынынъ «Промышленное и гражданское строительство» специальности бойынша кеспи алмага ниетленеди эм ниетин де толтырады. Оннан сонъ да Дагестан патшалык халк хозяйство институтынынъ «Бухгалтерский учет, анализ и аудит» специальности бойынша кеспи алады.
Руслан Муталимов оьзининъ ис аьрекетин «Червленные Буруны» госплемзаводындагы маданият уьйинде сантехник ис орынында баслады.
Оннан сонъ, Смоленск каласындагы ПМК трестинде курылыс боьлигинде уста болып та ис аьрекетин бардырды. Мунда ол уьш йыл узагында ислегеннен сонъ, тувган-оьскен якларына кайтып, Ногай ТП курылыс боьлигинде уста болып баслады.
Руслан Сыдыйык увылы Муталимов оьзининъ яшавы бойынша коьплеген ис йылларын Дагестан Республикасы бойынша 17-нши номерли районлар ара Ногай район налог инспекциясына берип келген.
–Мунда мен патшалык налог инспекторыннан алып боьлик етекшисининъ ис орынына дейим еттим. Ис аьрекет бойынша коьп янъылыкларды мага сулыплы налог инспекциясынынъ куллыкшысы Рафаэль Ахмедович Такташев, сол заманларда бу тармакты етекшилеген Тайбат Багатовна Манкаева коьрсеткенлер. Бу аьдемлер меним бактымда заьлимдей орынды алады деп айтпага болады, — деп хабарлайды Руслан Муталимов.
Руслан Сыдыйык увылы кайсы ис орында ислегенде де ога аьели кайсы яктан да коршалавшы эм колтыклавшы да болган. Хатыны Салият Ногай районы бойынша статистика етекшиси болып коьп йыллар иследи, аьли тийисли тыншаювда.
Яшавда уьйкен куьез тувдырады увылы Динислам ман кызы Танъбикединъ уьстинликлери. Олар экеви де йогары билимли специалистлер. Аьли Динислам Янъы Уренгой каласында газпромда куллык этеди. Кызы Танъбике Ессентуки каласында яшайды эм ис аьрекетин Ставрополь крайынынъ Предгорный районынынъ администрациясында бас бухгалтердинъ орынбасары болып бардырады.
–Мен оьзимнинъ балаларым ман оьктемсиймен, меним мерекемге рас барып келтирген тамамлардынъ ишинде балаларымды энъ де уьйкен савгам деп ойлайман,-дейди Руслан Сыдыйыкович.
Бу куьнлерде бизим сыйлы мерекешимиз Ногай районы бойынша ГАУ РД МФЦ етекшиси болып ислейди. Оьзек те, ис аьрекет бойынша кыйынлыкларга да йолыгадылар.
–Производстволык аьрекет пен байланыслы борышларды толтырмага туьседи. Йогары квалификациялы программисттинъ йоклыгы ис аьрекетимизге бираз тыйдажылык салады, офислик техникады да тийисли аьлде саклав эм кулланув ман байланыслы кыйынлыклар да тувадылар. Бу затлар баьриси де заман ман шешилетаган затлар. Ис аьрекет бара келе соларды да ерлерине салармыз,- деген сенимин билдиреди Руслан Муталимов. Ол бу куьнги мерекеге сондай уьстинликлер мен етисип туры. Алдыда мен Руслан Сыдыйык увылына тек ийгиликлерди, уьстинликлерди эм берк ден савлыкты йорайман.
Г.Курганова.
Суьвретте: Р.Муталимов.