Ногай районында социаллык куллыкшыларынынъ 90 проценти вакцинация оьттилер. Сондай билдируьв берди Ногай районында КЦСОН директоры Гульфира Капитуллаева. Онынъ айтувына коьре, 109 КЦСОН куллыкшыларынынъ ишиннен 97 аьдем вакцинация оьттилер. Прививка алув аьли де бардырылады.

– Бизим орталыкта 67 социаллык куллыкшысы ислейдилер, олар баьриси де прививка алганлар, неге десе олар эсли аьдемлерди савлай район бойынша аьжетсизлейдилер. Оьзлери канагатлайтаган ясуьйкенлерди авыртып коймайым деп эм оьзлерин яман мараздан саклайым деп социаллык куллыкшыларынынъ аьр бириси вакцинация оьтпеге токтастылар. Аьлиги заманда социаллык куллыкшылары оьз ис борышларын толтырадылар, ясуьйкенлерге уьйлерине азык-туьлик, дарманлар аькеледилер, олар ман вакцинациядынъ пайдалыгы акында хабарласувлар юритедилер.
Районда вакцинациядынъ оьтувин яман тувыл деп айтпага болады. Аьдемлер анъладылар, прививкадынъ ден савлыкка зарарлыгы йок, ол коронавирустан бек ийги коршалавшы амал. Баска яктан, авырувлылардынъ саны коьбееди, ерли больницага бизим ювыклар, авылдаслар туьседилер. Шексинетаганларды мен вакцинацияды оьтпеге шакыраман.
Аявлы ердеслерим, эгер гражданлардынъ айырым категорияларына прививка алмага керек болса, алайык. Бизим ден савлыгымызды ойлап, патшалык бизди тегин вакцина ман аьжетсизлейди, аьлимлердинъ билдируьвлери мен, сол вакцина савлай дуныяда энъ де ийгилердинъ бириси деп саналады, – деп айтады Гульфира Капитуллаева.