Тезлик ярдам боьлигининъ куллыкшылары куьн узагы ман, кешеси эм танъы ман коьмекке асыгадылар, оларга аьдемлердинъ яшавын куткармага да сийрек туьспейди. Ногай районындагы тезлик ярдам боьлигинде оьз исин ийги билген, бек бавырмалы, кенъ юрекли куллыкшылар аьрекетлейдилер.

Меним язганым бос соьзлер тувыл, неге десе бизим аьр биримизге де, тезлик ярдам боьлигининъ куллыкшыларын шакырмага туьскен эм туьседи: оьзимизге, балаларымызга яде болса эсейген ата ман анамызга. Меним де оларга занъ согып, коьмекке шакырган заманым болды. Соннан бери аз заман озбаса да, юрегимде разылыкты саклайман, олардынъ танълыгына, танымаган — билмеген аьдем уьшин янлары соьйтип авырып ярдам эткенлерине сукланаман. Олардынъ аьр бирисининъ атын эсимде сакламаган болсам да, эткен ислери, юрегиндеги ян авырувы аян коьринген коьзлери коьз алдымда турады. Меним ата-анама коьмек эткен, Ногай орталык больницасынынъ тезлик ярдам боьлигининъ аьр бир куллыкшысына таьвесилмес савболсынымды айтып, берк ден савлыкты, эткен яхшылыклары мынъ кабат болып оьзлерине кайтканын йорайман.
Бу куьнлерде тезлик ярдам боьлигининъ фельдшери Марина Сагнаевады Ногай районында коьп аьдемлер таныйдылар. Ол авырсынып шакырган коьп аьдемлерге оьз коьмегин эткен. Марина Викторовна Пермь каласында тувып-оьскен. Сол калада медицина колледжинде окыган. Медицина окув ошагын окып тамамлап, ис аьрекетин яс кыз Пермь каласындагы тезлик ярдам станциясында баслаган. Оьзи суьйген исти бардырган кыз куьннен-куьнге сулып алган.
– Авырыган аьдемге ярдам эткен сонъ, юрегинъди кайдай да бир аьлемет сезимлер бийлейди, оны бир зат пан да тенълестирип болмас деп ше айтып болмаяксынъ, ама кайдай да бир аьруьв сезимлер. Сол сага ислемеге де, коьмек этпеге де куьш береди эм аваслыгынъды боьтен де оьстиреди. Коьз алдымда янъы яшав да тувган, яшавын куткарган аьдем сав болып юргенин де коьргенмен, коьп разылык соьзлер айтканлар да аз тувыл. Куллыгымыз тыныш болмаса да, энъ де ийги эм суьйикли деп санайман, – деп боьлиседи тезлик ярдам боьлигининъ фельдшери.
Марина Викторовнады Пермь каласыннан Ногай районына суьйим аькелген. Ол Пермьде ислейтаган ногай йигити Расул Сагнаев пен танысады, яслар аьел курадылар. Бир неше йыл сол калада ислеп, олар 2000-ншы йылда Ногай шоьлге коьшип келедилер. Мунда бас деп кыскаяклы Ногай орталык больницасынынъ хирургия, сонъ реанимация боьликлеринде ислейди. Оннан сонъ куллык тезлик ярдам службасында шыгады эм Марина тувган каласында 11 йыл узагына эткен исин тагы да бардырып баслайды. Уялшанъ кыскаяклы оьзининъ акында коьп айтпага суьймейди, ама онынъ акында медицина коьмеги тийген аьдемлер коьп ийги соьзлер айтадылар.
«Маринадынъ колы енъил, бизи мен больницада яткан хатыннынъ кан тамырын (венасын) яс медсестралар таба алмайтаган эдилер, ол болса тез тавып, ийне уратаган эди. Марина – бек ийги куллыкшы, оьз исин йигерли толтырады», – деп мага онынъ акында айтканлар бар.
Коронавируслы маразынынъ пандемиясы заманында баьри медицина куллыкшылары ман бирге Марина Сагнаевага да арув-талувды билмей ислемеге туьсти. «Сол заманлар айлак коьп аьдемлер уьйлерине медицина коьмекке шакыратаган эдилер, яздынъ исси куьнлеринде биз, специальли кийимлер кийип, авырыган аьдемлердинъ уьйлерине баратаган эдик. Сол заманда оьзим де авырыдым», – деп сол тыныш болмаган куьнлерди Марина Сагнаева эсине алады.
Марина Сагнаева ийги иси уьшин «Ногайский район» МР администрациясыннан, Ногай орталык больницасынынъ бас врачы атыннан Сый грамоталары ман савгаланган.
Ак ниетли аьрекетке суьйими анасы Маринадан кызы Залинага коьшкен демеге болады. Залина Ессентуки каласындагы медицина колледжинде билим алган, бу куьнлерде Эркин-Шахар авылында тезлик ярдам службасында фельдшер болып ислейди. Маринадынъ оннан да уьйкен оьктемлиги бар. Уллы Аталык согысы йылларында нацистлер мен согыскан атайынынъ йолын бардырады онынъ уьйкен увылы Михаил. Ол бу куьнлерде Украина еринде оьтеяткан спецоперациясында катнасады, Астраханьдеги аьскершилик боьлигининъ автобронетанковый службасынынъ командири. Михаил оьзининъ оьсип келеяткан эки инисине коьрим болады, олар да агасынынъ йолы ман бармага ниетленедилер.
Янъыларда Марина Сагнаева ис йолдаслары ман бирге тезлик ярдам службасынынъ куллыкшыларынынъ куьнин белгиледи. Сол куьн оларга коьп йылы соьзлер айтылды, солардынъ сырасында биз де коьп яхшылыклар йорадык.
Н.Кожаева.
Суьвретте: М.Сагнаева кызы ман.