Кенъ тоьселип яйрап яткан Ногай шоьли Уллы Аталык согысы йылларында явдан босатылганлы быйыл 80 йыл толады. Соннан бери сол шаклы заман озса да, тарих бетлеринде сакланган 1942-нши йылдынъ бу эстеликли куьнлерининъ акында данък несилден-несилге коьширилип тураяк.

Бу мерекеге багысланып, республикамызда эм район еринде бу данъклы тарих бетлери мен байланыста коьп туьрли шаралар озгарылады эм озгарылаяк. Айтпага, ДР Яслар министерствосында Ногай район ерин немец-фашист шапкыншыларыннан босатылганлы 80 йыллыгына аьзирлик коьруьв эм оны белгилев бойынша кенъес озгарылды. Сонда ортакшылык эткен «Шоьл тавысы» республикалык газетасынынъ бас редакторы Эльмира Кожаева эске туьсиргенлей, 1942-нши йылда Ногай (Караногай) район ери явдынъ аьскершилер куьби мен кесек заманга бийленген. Олардынъ мырады Каспийге эм онынъ нефть байлыкларына шыгув эди. Ама партизанлардынъ эм генерал-лейтенант Николай Кириченкодынъ басшылавы астындагы 4-нши гвардиялык атлы механизированлы корпус кесеклерининъ биргелес куьшлери мен фашистлер район ериннен 1942-нши йылдынъ декабрине дейим толысынша кувылганлар.
Сол эстеликли мереке район еринде быйылдынъ 21-нши октябринде байрамшыланаяк. Ога багысланган туьрли шаралар озгарувда районнынъ билим эм маданият тармаклары, район китапхана, «Яслык» орталыгы, район уьлке танув эм мектеблер музейлери ортакшылык этедилер.
«Ногайский район» МР пресс-службасы эм «Шоьл тавысы» республикалык газетасы халкымыздынъ тарих бетлеринде сакланган эстеликли мереке акында кенънен-кенъ билдиреек, «Пройдем дорогами войны: освобождение Ногайского района» янъы медиаресурстынъ презентациясы оьтеек. Солай ок тыл куллыкшыларына эм Махач Дахадаев атындагы партизан отрядынынъ катнасувшыларына эстеликли белгиси токтастырылаяк.
21-нши октябрьде, бу эстеликли мереке байрамшыланаяк куьн, район орталыгында эстеликлер касына шешекейлер байламлары салынаяк, шатлыклы митинг, «Но в памяти такая скрыта мощь» деген концерт, спорт шаралары оьтееклер, байрам салют уйгынланаяк.
Бизим хабаршы.