Уьстимиздеги йылдынъ кырк кийик айынынъ 4-нши куьнинде Ямало-Ненец автоном округындагы «Ногай Эл» миллет маданият автономиясынынъ ерли ямагат организациясы баьри диаспоралары ман бирге «Тарих ярастырылувы – «Булакларга кайтув» деген шара уйгынлап озгарды. Хаирбек Аюбович Алакаевтинъ белгилеви мен «Тарих ярастырылувы – «Булакларга кайтув» деген проектининъ кенъесуьв майданы диаспоралар ара байланысув уьшин болады.

Бу проект соны ман яслардынъ элимиздинъ маданият туьрлилигине кызыксынувы ман яслардынъ патриотлык тербиялавына каратылган. Оьсип келеятырган несилде биз патриотизм, аьдиллик эм ийги йорыклык сапатларын тербияламага тийислимиз. Бизим коьпмиллетли каламыздынъ аьр бир ваькиллери оьз маданиятын, тилин, аьдетлерин билмеге керек деп санайман. Россиядынъ эм Ямалдынъ коьплеген калаларындай болып, Янъы Уренгой да коьпмиллетли каласы болады. Тек Янъы Уренгой каласында кырктан артык миллет ваькиллери яшап келедилер. Олардынъ аьр бирисининъ оьз маданияты, аьдетлери бар. Тарихлик аьллесуьвлери эм ногай, орыс халкларынынъ биргелес катнасувлары аьвелги заманларыннан алып болган, – дейди «Шоьл тавысы» газетасынынъ хабаршысына Х.Алакаев.
Тарих эстелигининъ сакланувы, баска болып «Булакларга кайтув» деген тарихлик ярастырувды озгарув бойынша Янъы Уренгой каласынынъ муниципаллык туьзилиси еринде яшайтаган халклар ара дослыкты беркитуьвге эм бирлесуьвге ярдам этилуьв – проекттинъ бас негизи. Шарада 1612-нши йылындагы кыйын заманлардынъ тарихлик кесеги коьрсетилди.
Проектининъ авторлары Янъы Уренгой каласынынъ яшавшылары Зуля Османова, Роза Баисова эм Фатима Есенакаева боладылар.
Суьвретте: шарадан коьринис.