«Минмелиоводхоз РД» Ногай филиалы Россия МВД-нынъ Ногай районы бойынша боьлиги мен бирге Терекли-Мектеб авылындагы коллектор татавылына канализация сувларын йиберуьвден тура тергев ислерин оьткерген.

Сонынъ барысында уьй-хозяйство иелерине коллекторга канализация сувларын ыхтыярсыз йиберуьв ярамайтаганы акында анълатув этилинген. Коьп аьдемлер коллектор татавылына канализация сувлары ыхтыярсыз йиберилетаганы ман муькир болганлар эм соны ювык арада токтатпага соьз бергенлер. Айырым уьй иелери аьлиги заманда уьйлеринде яшамайдылар эм сол зат бу исти йорыкка келтирмеге буршав береди.
«Минмелиоводхоз» Ногай филиалынынъ етекшиси Сафар-Али Сарсеев Терекли-Мектеб авыл яшавшыларын гражданлык анъламлыгын коьрсетпеге эм коькек айынынъ ызына дейим татавылга канализация сувларын йиберуьвди токтатпага шакырган.
«Сол тилек этилинмесе, биз баьри керекли шараларды коьреекпиз эм штрафлар салаякпыз», – деп белгилеген С.Сарсеев.