Бу куьнлерде элимизде коронавируслы юкпалы маразы бойынша аьллер осалланадылар. Авырув аянланган биринши куьнлерде савлай дуныя аьдемлери адалады. Кыйын аьллер болса да, тез арада коьп госпитальлер курылдылар, врачлар «кызыл зонада» колыннан келгенин этип, келмегенди де этпеге шалыстылар.

Куьннен-куьнге, айдан-айга эм йылдан-йылга бу авырув оьзининъ кара ниетлигин коьрсетеди. Сол заманлар ишинде биз коьп аявлы аьдемлеримизди йойдык, коьп инсанларга авырувдынъ авырлыгын шекпеге туьсти. Савлай дуныя аьдемлери коронавируска карсы вакцинадынъ шыгарылувы акында мырат эттилер. Суьйинишке, бизим элимизде дуныяда энъ де биринши болып коронавируслы маразына карсы вакцина шыгарылды. Оннан сонъ экиншиси, уьшиншиси… Россияда шыгарылган вакциналар ийги деп белгилендилер. Бизге коронавируслы маразын енъмеге амал берилди демеге де болады. Уьйкен оькинишке, коьп аьдемлер вакцинацияды оьтпеге суьймейдилер. Олар айтылган врачлардынъ, аьлимлердинъ вакцинациядынъ пайдасы, оны этпеге керек экеннен тура маслагатларын тынъламай, танымаган-билмеген, медицина тармагында бир уьстинликлерге де етиспеген аьдемлердинъ шакырувларына ынанадылар.

Мен оьзим вакцинацияды бириншилер сырасында оьткенмен. Оьзимнинъ ювыкларыма да вакцинацияды оьтинъиз деп маслагатымды бергенмен. Олардынъ коьбиси прививка эттиргенлер. Коронавируслы маразына карсы прививка урылган аьдем авырымага да болады, ама онынъ авырувы енъил оьтеди. Энъ де маьнелиси, коронавируслы маразы бизим арамыздан аькеткен аьдемлердинъ сырасында вакцинация эттиргенлер йок. Сога коьре вакцинация – энъ де сенимли коршаланув. Оьзимиздинъ эм ювыкларымыздынъ ден савлыгы акында ойланып, вакцинацияды тез арада оьтейик.
А.Махмудова, врач-педиатр.