Статистика бойынша пандемия заманында Дагестан Республикасында 2713 аьдем оьлген. Бу санлар бизди тынышсызландырмай болмайды. Ызгы эки юмадынъ ишинде республика бойынша 151 аьдем коронавируслы инфекциясы ман авырыган деп белгиленеди. Буьгуьнлерде биз маразды токтатув акында ойламага керекпиз.
Маразды токтатпага боламыз, эгер аьр аьдем вакцинацияды оьтсе. Биз, коьп миллетли республикадынъ яшавшылары, Дагестан Республикасынынъ Роспотребнадзор управлениесининъ талаплавларын толтырмага керекпиз. ДР Аькимбасынынъ тапшырувларын толтыра келип, аьр бир дагестанлы оьз гражданлык борышын ерине еткеруьв керекли.
Аьлиги заманда Ногай районында вакцинацияды 6455 аьдем оьткен. Менимше, бу соравга яваплылык пан карамага керек. Аьллер савлай элимиз бойынша осал, бизим больницада 26 аьдем эмленеди. Конъысы Ставрополь крайында да аьллер осал деп айтпага боламыз. Бир куьннинъ ишинде мунда 411 аьдемлер авырды деп аянланган. Ставрополь крайынынъ губернаторы Владимир Владимировтынъ билдируьвине коьре, мараздынъ яйылувы тоьмен болмайды, оьлимлер де коьп болады. Биз Ставрополье мен конъысы болып турамыз, сога коьре, сак болув керек. Биз авырымага болатаган инсанлар, йойытпага болатаган ювыкларымыз акында ойламага керекпиз. Тезден савлай элимиз бен тыншаюв куьнлерге кетемиз. Мен баьрисин де сол куьнлерде вакцинацияды оьтпеге шакырамыз, неге десе авырувды енъуьв уьшин вакцина алув – энъ де маьнели ис.
Республикада буьгуьнлерде гражданлардынъ кавыфсызлыгын аьжетсизлев ниет пен баьри амаллар да алынады. Республикамыздынъ басшысы Сергей Меликовтынъ айтувы ман, Дагестанда «тезлик ярдам» коьликлерин шакырувлар айлак коьп болды, коронавирустынъ авыр кеби мен авырыйтаганлар да коьбейди. Соны ман байланыста, Сергей Меликов медициналык учреждениелерин кислород пан канагатлав соравын карамага эм регионда кислород шыгаратаган предприятиелер курмага тапшырув этти. Сондай ислер регион басшысынынъ бас деп гражданлардынъ кавыфсызлыгы, олардынъ ден савлыгы акында ойлайтаганын коьрсетеди. Соны биз анъламага керекпиз. Эгер савлай халкымыз вакцинация оьтсе, мараз да артка таяр.
Г.Бекмуратова, Россия Журналистлер союзынынъ агзасы.
