Украина еринде специальли аьскер операциясы юретаганлы ярым йылга да ювыклап бараятыр. Куьн сайын россия аьскершилери Донецк эм Луганск халк республикаларыннан йигитлер мен биргелесип, йигерлик эм баьтирлик коьрсетип, ерли яшавшыларды коршалап, XXI оьмирде кайтадан турган – фашизм эм неонацизм баьлеси мен белсенли куьрес юритедилер.

Бу куьнлерде Украина ерининъ зорлыкка калган тынышлы яшавшыларын коршалавга аз аьдем шыкпаган. Аьлиги заманларда контрактлы, оьз ыхтыярлары ман аьскер службаларын юриткенлер де Украина еринде тек неонационализмди йойытувга куьш салып калмайдылар, олар йигитлик коьрсетип, оьз атларын тарихте оьмирлетедилер.
Украина еринде тынышлык уьшин куьресуьвге шыкканлар, колларына савытлар алганлардынъ санында Ногай районымыздынъ яслары да бар. Олардынъ биревлери аьскер комиссариаты ман шакыртылганлар, оьз ыхтыярлары ман согыс майданларда катнасатаган йигерли йигитлеримиз де бар. Сол йигитлердинъ атларын биз уьйкен оьктемлик пен, юреклеримиздинъ терен сезимлери мен, коьзлеримизде коьзяслар ман, авызымызда оларга савлык тилевимиз бен айтамыз.
– Мен оьз ыхтыярым ман Украина ерининъ (Россия Президенти Владимир Путин куьш салувы ман энди Россия Федерациясынынъ япсарларын –Донецк, Луганск Республикаларын, Херсон эм Запорожская областьлер) тынышлы яшавшыларын зорлыктан босатувга йолландым, сонда барувым да босына тувыл, меннен алдын сол урысларда катнасувга меним иним (курсак бир тувыл) кеткен эди. Мен оьзим бактымды яслай аьскерлик аьрекети мен байланыстырганман, элимнинъ алдында оьзимнинъ киели борышымды да толтырганман. Меним ойымша, эр йигит кайсы заманда да, оьзининъ яшав оьмирине карамастан, дайым элди коршалавга аьзир болмага керек. Мен согыска кетемен деген соьзимди хатыным да рахатлык пан тынълады эм кабыл этип те алды. Ол мени мен бас косатаган заманларда аьскерши экенимди де эм кайсы заманда да мен элди коршаламага шыкпага аьзирлигимди де билген. Мен оьзимнинъ согыста катнаскан аталарымнынъ асабалыгына сый этип, оьзимди де элиме пайдалы экенимди коьрсетпеге борышлыман. Бу куьнлерде мен сол аталарымдай болып, элиме енъуьв мен кайтаягымды билемен, –деп хабарлаган согыска кетип бараяткан Алимбек Доржиев.
Алимбек Залимхан увылы Доржиев Ярославль каласындагы аьскер финанс-экономикалык окув ошагын окып битиргеннен сонъ, уьш йыл узагында Узак Куьнтуварда, аьскер боьлигинде финанс службасынынъ етекшиси болып куллык эткен.
Элди коршалавга шыккан Алимбек Залимхан увылы Доржиевти уьйинде онынъ тандыр отын саклавшы хатыны Марина ман увыздай таьтли аьвлетлери тек енъуьв мен куьтедилер.
Г.Сагиндикова.
Суьвретте: Алимбек Доржиев хатыны Марина ман.