Ислам, кишкей заманыннан алып, атасынынъ аьскер сырасында болган йылларындагы суьвретлер альбомын актарып, аьр бириси бойынша сорав берип, кызыксынып туратаган эди. Бу куьнлерде Ислам оьзи Россия Федерациясынынъ Савытлы куьшлерининъ сырасында оьзининъ эр борышын толтырады.
Аьскерлик борыш – патшалык федераллык службасынынъ айырым бир кеби болады. 18 ясына толган эр кисидинъ аьр бириси, эли алдында бурыннан борыш болып келетаган исти толтырмага керек болады. Аьскерлик службасынынъ бас борышы – патшалыкты, ямагатты эм элди коршалав.
Ызгы заманларда элимизди коршалавда керексинеди. Соны тек патшалык етекшилери билдирип калмайдылар, яс аьдемлер де бек аьруьв анълайдылар.
Ислам Шандиев, Батыр-Мурза авыл орта мектебин кутарганнан сонъ, Сургут каласындагы нефтяной окув ошагына окымага туьседи. Ол окувын кутарганлай ок, Савытлы куьшлер сырасына алынды.
Исламнынъ атасы ман анасы, бу куьнлерде, оны ман бек оьктемсийдилер. Оьзек те, анасы Гульнизардынъ билдируьвине коьре, ога бир яктан коркынышлы, баласы уьшин навасын йойганын да айтпай калмады. Анады да анъламага болады. Боьтен де, элимиз тынышлы заманларда яшамайтаган шакта, конъысы япсарларда озып туратаган урыслар, сонда ян беретаган ердеслеримиз, баьриси уьшин де кыйналамыз, йойымга кайгырамыз… Оьзек те, болса экен ер юзинде де тынышлык, торгайлардынъ йырлавына толган танълар атса экен…
Аьли Ислам Еврей автоном округында аьскер сырасында борышын толтырады. Сонда оьзине сый да казанады, тенъ-дослар ман да ийги аьллеседи.
– Ислам эки кыздан сонъ тувган кенжепайым, биз оны эр йигитке келисли аьдетлерге таянып, тербияламага шалыстык, атасы Джабраил ога оьзининъ аьскер сырасындагы йыллары акында хабарлайтаган эди. Сонда бирге болган туьрли ерлерден йигитлер, олар араларында тувган дослык акында аз айтпаган. Сога коьре, биз патриотизм сезимлерин коьндиргендирмиз, деп ойлайман, – дейди Гульнизар Шандиева.
Аьли Ислам оьзи де дослык эм аьдемлер ара шынты аьдемшилик деген касиетлердинъ уьйкен маьнеси барын аьруьв анълайды. Аьскер сырасында бирге болган йолдаслары ман сол дослыкты сав яшавы бойынша сакламага шалысаяк.
Г.Курганова.
Суьвретте: Ислам Шандиев.