Яшав оьмиримиз бойынша яхшылыклар коьргенлей, кыйынлыклар ман да расатаган заманларымыз болады. Алла-Таала бизге ювыкларды бергенлей, алган куьнлерди де береди. Меним увылым Амирхан яшавдан яслай кешип кетти. Бу йыл ол мектебти битиргенли 30 йыл толаяк эди, оькинишке, увылым сол куьнге етпеди. Оны ман бирге окыган тенъ-дослары Амирханды дайым эслеринде саклайдылар, Алла оларга разы болсын. Бу йыл олар мерекели йылына йыйылганда мени де эслерине алып, уьйиме келип аманшылыгымды билип, йолдасларын эскерип кеттилер. Айхай, увылым сол куьнди коьрген болса экен, тек йогарыдан берилген бактыга карсы шыгып болмаймыз.
Аьли ак юрегимнен оларды мектеб йылларында окыткан окытувшылары Оравхан Тенъалиевна Кульчимаевага, Сайдат Елкайдаровна Максутовага эм А-Х.Джанибеков атындагы мектебин 1992-нши йыл окып битирген выпускниклерин кутлайман. Аьр бирисине ден савлыкты, узак оьмирди, оьзлериннен тувган балаларынынъ хайырын коьргенди йорайман. Мени де, оьзлерининъ тенъ-досы Амирханды да мутпайтаганлары уьшин муьсиревли савболсынымды айтаман.
Амирханды окыткан окытувшыларга, берген билимлери уьшин разылыгымды билдиремен, кыйынынъыз тек ийгиликке язылсын.
Фаризат Муртазалиевна Байгараева, Терекли-Мектеб авыл яшавшысы.