Янъыларда «Ногайский район» МР администрациясынынъ аькимбасы М.Аджековтынъ етекшилеви астында ерли Терроризмге карсы комиссиядынъ кенъеси озгарылды. Шарады район аькимбасынынъ кавыфсызлык яктан аьжетсизлев бойынша орынбасары, ерли АТК секретари Баймагомед Ярлыкапов юритти.

Кенъесте ойласувга 6 соравлар салынды, солардынъ ишинде – район еринде яшайтаган шет эллерден келген гражданлардынъ арасында алдын шалув куллыкты юритуьв, оларды экстремист эм террорист аьрекетине киргистпес уьшин амаллар алувын уйгынлав, «Ногайский район» МР-да АТК эм правосаклав органлары ман биргелесте район дин эм ямагат организацияларынынъ ваькиллерининъ ислеви, «Интернет» социаллык тармакларында эм коьлем информационлык амалларында террористлик идеологиялык билдируьвлердинъ яйылувынынъ алдын шалув акында, патшалык, ямагат, инсан кавыфсызлыгын канагатлав бойынша террористлик кавыфтынъ дережесин аянлав уьшин биргелес тренировкалар озгарув, Терроризмге карсы миллет комитетининъ, Дагестан Республикасында, Ногай районында Терроризмге карсы комиссиялардынъ токтасларын толтырув, Ногай районында ортак билимлендируьв учреждениелерди инженерлык-техникалык коршалав эм саклав амаллары ман канагатлав.
Кенъесте «Ногайский район» МР-да «Яслык» яслар орталыгынынъ етекшиси Н.Арсланов, Ногай район имамы А.Танаев, авыл поселениелерининъ, ямагат организацияларынынъ етекшилери эм ваькиллери, район активи ортакшылык эттилер. Белгиленген соравлары бойынша этилинген куллыклары акында организациялар етекшилери шыгып соьйледилер. Олардынъ кайбириси терроризм эм экстремизм идеологиясына карсы кайдай амаллар алынатаганы акында айттылар. Н.Арслановтынъ айтувына коьре, районда шет эллерден келген гражданлар ман алдын шалув хабарласувлар юритиледи. Бу сорав бойынша Б.Ярлыкапов республикадан келген специалистлер район бойынша этилинетаган куллыклар ийги этип бардырылады деп белгилегенин айтты, болса да аьли де исти бардырув керек деп айтты. Район имамы терроризмге карсы куллык правосаклав органлары ман, район эм авыл администрациялары ман биргелесте юритиледи деп белгиледи, сол зат оьзининъ ийги сырагыларын береди. АТК председатели М.Аджеков бу ерде дин аьрекетшилерининъ белсен ислевин баскаларга коьрим этип коьрсетти. Эльмурза Союн увылы Саитов оьз соьйлевинде райондагы аьллерди яман тувыл экенин белгиледи, ама аьли де ислемеге керек, куллыкларды токтатув керек тувыл деп айтты. Ногай районынынъ Хатын-кызлар советининъ председатели А.Манкаева терроризмге карсы этилинетаган куллыклары акында хабарлады. Билимлендируьв боьлигининъ етекшиси А.Агаспарова мектеблерде окувшылар кавыфлы сайтларга кирип болмасын деп, компьютерлерде контент-фильтрлер салынганы акында айтты, билимлендируьв учреждениелеринде терроризмге карсы туьрли конкурслар озгарылады деп белгиледи.
Баймагомед Амин увылы «Шоьл тавысы» республикалык газетасы бу сорав бойынша коьп куллык этетаганын белгиледи, ол айырым Эльмира Кожаева ман салынган «Алданганлар» кинофильми акында айтты, буьгуьнлерде яслар ман ислевде ол бек ийги амал, бек ийги «савыт» экенин айтып эситтирди. Терекли-Мектебте орынласкан Кизляр каласындагы федераллык кавыфсызлык управлениесининъ 3-нши боьлигининъ куллыкшысы С.Боранбаев оьз куллыгы акында айтып, бир неше соравларга явап берди.
Кенъести тамамлай келе, АТК секретари Б.Ярлыкапов авыл поселениелерининъ аькимбасларына НАК, республика, район бойынша АТК токтасларын толтырув бойынша куллыкты белсенлетуьв керек деп борыш салды.
Г. Бекмуратова.