Уьстимиздеги йылдынъ увыт айынынъ ызгы куьнлеринде, Донбасс каласынынъ етекшилерининъ тилек салувы ман, Россия Федерациясынынъ Президенти Владимир Путиннинъ аьризеге кол басувы ман, Украина еринде Россиядынъ Савытлы куьшлери спецоперациясын басладылар. Сегиз йыл узагында Донецк эм Луганск Республикаларынынъ яшавшылары зорлыкты шыдап яшадылар. Энди болса, шыдамлык та, куьш те калмаганда Россия элиннен ярдам тиледилер. Бу куьнлерде белгиленген спецоперация аьли де юреди. Тыныш яшайтаган халк та кыйналады, урыслар болатаган ерлерден кала яшавшылар (оьз аяклары ман юрип болатаганлар) уьйлерин таслап кетедилер, амаллары йоклар не этсинлер, манъгазыларда калмага керек боладылар. Элбетте, оларга ас та, сув да керек.
Россия Федерациясынынъ туьрли объектлерининъ яшавшылары кыйынлыкта калган йолдасларга оьзлерининъ колларыннан келген коьмеклерин этпеге токтастылар. Сол санда Ногай район яшавшылары да оьз косымларын этти. Янъыларда ДНР эм ЛНР еринде кыйынлыкка калган эм кашкан яшавшыларга азык-туьлик йиберилди. Сол тыныш болмаган исти «Ногайский район» МР администрациясында ХТО етекшиси Рустам Будайхан увылы Гапаровка тапшырылды. Гуманитарлык ярдамды йыйнамага да, тийисли ерге еткермеге де тыныш болмагандыр. Соны ман байланыслы болып, оьзимиздинъ бир неше соравларымызды Рустам Гапаровка бермеге токтастык.
– Рустам Будайханович, бизге белгили болганлай, Ногай районы бойынша сиз, кыйынлыкка калганларга 3-4 тонна азык йибермеге керек болгансынъыз, сонынъ орынына 11 тоннага ювык азык йиберилген. Сол ислер калай юргени акында айтып кетпеге тилек саламыз.
– Уьстимиздеги йылдынъ навруз айынынъ басында «Ногайский район» МР администрациясында аьр юма сайын болатаган бир аппаратлы йыйында «Ногайский район» МР администрация аькимбасы Мухтарбий Аджеков районымызда бар учреждениелердинъ куллыкшыларынынъ коьмеги мен ЛДНР яшавшыларына азык эм энъ де керекли алатлар ман гуманитарлык ярдамын йыйнамага буйырык берди.
Савболсынлар, Ногай районымыздынъ баьри учреждениелери де оьзлерининъ колларыннан келген коьмеклерин эттилер. Уьйкен косым ерли сатувшылардан, коьшимли малшылык хозяйстволарынынъ иелериннен коьмек болды. Айтпага, сатувшы Бадий Елакаев колай баасына бизге Пятигорск каласыннан барып, азык-туьлик аькелди, Насият Темирова таьтли зыяпетлер мен канагатлады.
Гуманитарлык ярдамды йыйнаган заманларда мен 18 коьшимли малшылык хозяйстволарына бардым, оьз ойымды билдирдим, баьриси де оьз колын созды, бирер кой малдан бердилер. Сонъында сол малларды сатып, алган акшага керекли азык-туьликти алдык, аьли уьшин 45 мынъга ювык акшамыз калды. Алдыда тагы да бир кере гуманитарлык ярдамымызды этпеге ниетимиз бар.
Бу озган акцияда аьр бир организация катнасады, кыйынлыкка калган ЛДНР яшавшыларынынъ кайгысын боьлиспеге шалысты. Ногай районы бойынша Россия МВД боьлигининъ куллыкшыларына уьйкен разылыгымызды билдиремиз. Олар 3 тонна ун, соннан коьп кем болмаган секер, кендирмай ман канагатладылар. Ун яктан «Баракат» туькен иесиннен де коьмек болды, ол бизге сатып турган унынынъ баасын туьсирип, оьзиннен де косып бир мешок берди. Аьр бир аьдемнинъ эткен садакасы кабыл болганды тилеймиз. Тек бу ерде авыл администрацияларынынъ етекшилерине бираз аьйибимиз бар. Олардынъма яде болса, баскалардынъ куьнаси мен ме (оьлшемин белгилеген тармак та бар), оьлшеми айлак аз азыклар аькелдилер. Айтпага, бир авыл администрациясына 20-30 килограмм куьрпе коспага уят болмаганма экен? Бу ерде куьналиди ше излемеймиз, тек биринши болганнан сонъ, янъылыс та кетпей болмас, эндигиге мукаят болармыз.
– Рустам Будайханович, сиз айлак саваплы исти толтырдынъыз, сизге де уьйкен савбол айтамыз, йыйналган азык-туьликти тийисли ерге еткермеге кыйын болдыма?
– Волонтерлар болган болса, артыкаш болмаяк эди. Йыйналган азык-туьликти автокоьликке тиемеге авырлык болды. Йыйналган ерден коьлик токтаган ер бираз армаганда эди. Автокоьликти бизге Ногай районы бойынша Россия МВД боьлиги берди. Сонынъ алдына «Гуманитарная помощь от Ногайского района» деген язувы ман баннер салып, тийисли ерге аькеттик.
– Рустам Будайханович, сиз йогарыда билдирип кеткенлей, аьли де сондай ярдам этпеге ниетинъиз бар, сога оьз косымын эткиси келген аьдем кайда бармага яде тел согып билмеге болады?
– Бизде бек ийги соьз бар: «Ярдамга созылган кол курымас», – деп, сога коьре, кайдай коьмекти де биз хош коьрип аламыз. Ниетимиз де яшавга тез арада шыгар деп сенемиз. Эгер коьмек этпеге суьйген аьдем бар болса, 8-9-28-800-52-70 номерли телефонга тел сокпага боласыз.
– Рустам Будайханович, савболынъыз бизге айырган заманынъыз уьшин. Эткен исинъиз тек ийгиликке язылсын.
Сыйлы Ногай районымыздынъ яшавшылары! ДНР эм ЛНР яшавшыларына гуманитарлык коьмек этуьв акциясына оьз косымын этпеге суьйгенлер бар болса, йогарыда белгиленген номерли телефон ман тийисли билдируьвлерди алмага боласынъыз.
Керексинетаган аьдемлерге бас деп кайдай товарлар керегин билдиремиз. Тоьменде коьрсетилген товарларды йыйып йибермеге боламыз: – консервалар (эт, балык, ясылша эм с.б.); тамак-азыклар (туьрли сорт лакса, шай, кофе, секер, кендирмай, сисе сувлар эм ишимликлер); оьзин тазалыкта саклав амаллары (сабын, тис тазалав амалы, памперслер, тастамаллар эм с.б.); бала тамакланув азыгы; уьйшиликте кулланылатаган химия товарлары, бир кере кулланылатаган савыт; медицина товарлары (дарманлар, яралар байлавда, ийне урувда кулланылатаган эм с.б. затлар).
Хабарласувды Г.Сагиндикова юриткен.
