Ногай район орталык больницасынынъ куллыкшылары тийисли тыншаювга шыгув шагына еткен ис йолдаслары – больницадынъ балалар тувув боьлигининъ акушеркасын эм санитаркасын йолга салдылар. Олар – Н.Эспергенова эм Р.Абдулкеримова.
Насипли Аджиисиевна Эспергенова район больницасында кыйын салувга яшав оьмирининъ 44 йылын багыслаган. 1977-нши йылда Кизляр медучилищесинде окып, акушер кесписин алып, ол оьзининъ ис аьрекетин хирургия боьлигинде медсестра болып куллык этуьвден баслаган. Сонъында Червленные Буруны участок больницасында, «Тезлик ярдам» службасында фельдшер болып ислеген.
1987-нши йылдынъ август айыннан алып район больницасынынъ балалар тувув боьлигинде акушерка болып куллык этеди. Сулыплы акушеркадынъ ярдамы ман ер юзине бир неше несил саьбийлер энген.
– Ол авырувлыларга уьйкен эс каратып болувлыгы ман, танълыгы ман, ис йолдасларына ярдамласпага дайымлык аьзирлиги мен, оьз ис орынында йогары яваплылыгы ман баскаланады, – деп белгилейди Ногай ЦРБ бас врачы Фаризат Межитова.
Раиса Худайбердиевна Абдулкеримова оьзининъ баьри ис йылларын, ашыклап айтсак, 1985-нши йылдынъ 20-ншы ноябриннен алып буьгуьнлерге дейим район больницасынынъ балалар тувув боьлигинде санитарка болып куллык этуьв мен озгарган. Оны баьри де белсен куллыкшы, медорганизацияда яде район дережеде оьткерилетаган туьрли маданият эм баска шаралар (айтпага, боьликти йыйыстырув, субботниклер) уйгынлавшысы деп биледилер. Ол дайым да боьлик заведующийдинъ сенимли коьмекшиси эди.
Тийисли тыншаювга шыгув ман Насипли Эспергеновады эм Раиса Абдулкеримовады ис коллективи атыннан Ногай ЦРБ бас врачы Фаризат Межитова, больницадынъ бас врачынынъ эмлев иси бойынша орынбасары З.Куруптурсунова эм балалар тувув боьлигининъ заведующийи Г.Тангаева кутладылар, коьп йыллар бойы намыслы эм оьз кеспилерине алаллык пан кыйын салганлары уьшин разылыкларын билдирип оздылар.
Коллектив атыннан эстеликли савгаларды Насипли Эспергеновага эм Раиса Абдулкеримовага ЦРБ-дынъ профсоюз комитетининъ председатели З.Шугаипова тапшырды.
Э.Кожаева,
«Шоьл тавысы» республикалык газетасынынъ бас редакторы.
Суьвретте: Ф.Межитова, Н.Эспергенова эм Р.Абдулкеримова.
