Дагестан маданиятынынъ эм тиллерининъ куьнинде, 21-нши октябрьде, «Россия – меним тарихим» деген тарих паркынынъ майданында «Тил – халк тарихи» деп фестиваль озгарылды. Ол ДР Миллет политика эм дин ислери министерствосындагы Орыс тил эм маданият орталыгынынъ демевлик этуьви мен болып озды.

Йыйылганларга каратылган кутлав соьзлери мен ДР миллет политика эм дин ислери бойынша министри Энрик Муслимов, «Россия – меним тарихим» тарих паркынынъ директоры Тимур Велиханов эм ДР-нынъ «Орыс тил эм маданият орталыгы» деген ГБУ директоры Руслан Луговой шыгып соьйледилер.
Шарада конак эсабында республикадынъ йогары окув ошакларынынъ студентлери, сонынъ ишинде шет эллер (Ливия, Алжир, Ливан, Азербайджан, Бангладеш, Йемен, Монголия, Чад, Зимбабве эм Сьерра-Леоне) студентлери ортакшылык эттилер.
Шыгып соьйлегенлер Дагестан маданиятын эм тиллерин саклав керегин белгиледилер.
– Россия Федерациясынынъ энъ уллы байлыгы – онынъ коьп тиллиги, эм буьгуьн байрам эсабында белгиленеяткан Дагестан маданиятынынъ эм тиллерининъ куьни бизге аьр халктынъ оьз эдап-нызам йорыклары, аьдетлери барлыгын эске салады. Бу баьри заттынъ негизи – ана тили, сонынъ уьшин биз келеектеги несиллер уьшин ана тиллерди саклав уьшин колымыздан келген баьри затты этпеге тийислимиз, – деди ДР Миллет политика эм дин ислери бойынша министри.
Байрам куьни йогары коьнъилликте, туьрли халклар ваькиллери катнасып, концерт пен тамамланды.
Бизим хабаршы.