Биз коьп йыллар бойы тынышлы аспан астында яшап, аьеллер курдык, билим алдык, аслык оьстирдик. Биз наьсипликте, суьйиниште, парахатлыкта яшадык Россиядынъ, республикадынъ, районнынъ туьрли оьрленуьв тармакларында куллык этип, оьз гражданлык борышымызды толтырдык. Биз халкымыздынъ оьрленуьвине, оькиметлик статусын алган маданият ошакларына суьйиндик. Бизди Терекли-Мектеб авылында Филипп Капельгородский атын юргистетаган ярасык парк, бизим авыллар курылыслары, бас каламызда билим алмага амалы болган балалар эм коьплеген баска затлар суьйинтти.

Бу баьри затлар уьшин биз элимизге авыр Уллы Аталык согысы йылларында оьз яшавлар баасы ман Тувган еримизди коршалаган эм бизге бу наьсипли йылларды савкатлаганларга уьйкен разылык соьзлеримизди каратамыз.
Россия Президенти Владимир Путиннинъ спецоперация озгарув ман байланыста кабыл этилип алынган карарга яваплап, элимиздинъ аьскершилери, сонынъ ишинде Дагестаннан эм Ногай районыннан, Россияды коршалавга турдылар. Сол согыс урысларда катнасып, 8 йыллар узагында Киев режими астында аьдемлерди коршалап, янларын курман эткен россия аьскершилер арасында яс офицер, аьскер академиясынынъ туьнегуьнги выпускниги К.Елманбетов, оьлгеннен сонъ «Йигитлик ордени» мен савгаланган Уьйсалган авыл яшавшысы А.Байрамов та болганлар. Аьр аьскершиди йоюв – ол онынъ аьелине, халкымызга эм савлай Россияга уьйкен баьле-каза. Коьзлеримизде коьзяслар ман, ама уьйкен оьктемлик пен карадык биз орталык телевидениеден бизим Россия Элин коршалавшы, Терекли-Мектеб авыл яшавшысы Д.Мамутов акында.
Халкымыз РФ Президенти Владимир Путиннинъ толы болмаган мобилизациясы акында шакырувды бир тавыстан хош коьрдилер эм патриотларымыз аьскерлик борышын толтырувга турдылар.
Биз оларды тувган ерине аман-эсен кайтканын асыгыслы куьтемиз. Тоьбеде куьн коьзининъ ярык саьвлелериннен, таза аспаннан эм ювыклардынъ суьйинишли юзлериннен баа зат йок! Бир-биринъизди сакланъыз!
А.Манкаева,
район Хатын-кызлар советининъ председатели.