Кизляр районында яшавшылардынъ коронавирус яйылув маразыннан вакцина эттируьв бойынша иси токтамай бардырылады. Кизляр ра- йон администрациясынынъ пресс-службасынынъ билдируьвине коьре, муниципалитетте аьлиги заманда коронавирустан 25637 аьдем вакцинацияды оьткен.

Оьткен юма ишинде Косякино авыл орта мектебининъ етекшисининъ тербиялав иси бойынша орынбасары Патимат Абдуллаева (суьв- ретте) ревакцинацияды оьтти. Ол оьзининъ ден савлыгы акында хабарлай келип, район яшавшыларына прививкадан коркпага керек тувыл, деген маслагаты ман боьлиседи эм, бириншилей, оларды юкпалы маразыннан коршаланмага шакырады.
«Мен дайым ис йолдасларым ман эм балалар ман аьллесип келемен. Сонынъ уьшин олардынъ ден савлыгы эм кавыфсызлыгы уьшин яваплы экенимди сеземен. Меним уьшин вакцинация – ол тоьгеректегилерге сый этуьв эм баскадынъ алдында аьр биримиздинъ социаллык яваплылыгымыз болады. Биринши прививкады мен 2021-нши йылдынъ навруз айында, экиншисин коькек айынынъ басында эттиргенмен. Вакцинацияды бек ийги оьттим. Сол заман ишинде бир де авырымадым. Оьз сынавым бойынша негизленуьвимде, вакцинациядынъ пайдалыгы акында ашык айтпага боламан. Яйылув маразыннан коркыныш аьли де сакланады, кайбир регионларында яйылув маразы бойынша аьл бек оьткирленип барады. Меним ойым ман, алдын грипп вирусына карсы прививка эттиргенлей, бу яйылув маразыннан да вакцинады алмага керек. Вакцинациядан коркпага ярамайды, ама мараз оннан да коркынышлы. Бизим аьр кайсымызды да алдыда узак яшав саклайды, сонынъ уьшин бизге оьзимизди эм оьз ювыкларымызды сакламага керек», – дейди Патимат Абдуллаева.
Кизляр районынынъ яшавшыларынынъ эслерин каратамыз: аьлиги заманда муниципалитет еринде вакцинацияды этуьв бойынша 8 пунктлары куьн сайын аьрекет этедилер. Вакцинацияды аьр ким де бос заманында барып алмага ыхтыяры бар.