Терен билим буршав бермес. Билимге ымтылган аьдем кайсы ерде де сый-абырай да казанады, оьзи де бар билимин арттырмага шалысып турады. Тоьгерек яктагы баьри зат пан да кызыксынып турады, ол катнаспаган ерлер аз болар деп ойлайман. Соьзим – Пятигорск каласындагы патшалык университетининъ прикладная информатика факультетининъ студенти Руслан Алибек увылы Янполов акында. Яс ердесимиз бу куьнлерде оьзи окыйтаган йогары окув ошагынынъ яшавында белсен катнасады эм туьрли Савлайроссиялык, регионаллык шараларда ортакшылык этип, коьп ерлерде оьз билимин арттырады.
Руслан Янполов 2018-нши йылда Кадрия атындагы орта мектебин тек йогары белгилерге окып битирип, биз йогарыда белгилеген окув ошагына туьскен эди. Бу куьнлерде Руслан – уьшинши курсын етимисли тамамлап турган студентлердинъ бириси. Онынъ сондай етимислери мен ювыклары, тувган-кардашлары оьктемсийдилер. Боьтен де, уныгынынъ сондай терен билимли болып, туьрли ерлерде атын ийгилик пен айттырувына суьйинеди тетеси Вайдат Исмаил кызы Янполова.
– Руслан-кедем кишкей заманыннан алып эсап дерисин бек суьетаган эди. Соны ман мектебти окып кутарганнан сонъ да, эсап пан, сан ман байланыслы кеспиди сайлады. Аьли уьшин ол бизди тек куьезлендиреди, куванышымызга куваныш косады. Бизим атайларымыздан калган ийги соьзлердинъ бириси – Баладынъ баласы балдан таьтли, сога коьре онынъ уьстинликлерине биз айлак куьшли суьйинемиз, олардынъ эткенлери оьз балаларымыздыкыннан да артыктай болады, – дейди Вайдат Исмаил кызы йылы куьлемсиреви мен.
Элбетте, Руслан Алибек увылы Янполовтынъ катнаскан эм ортакшылык эткен шараларынынъ сыралары айлак кенъ.
Бу куьнлерде ол Пятигорсктагы патшалык йогары окув ошагынынъ аспирантлар эм студентлер Советининъ яратувшылык комитетининъ председатели, «Сулып» Сырт-Кавказ яратувшылык билимлендируьв проектининъ бас уйгынлавшысы эм етекшиси, «Медиа мектеби», «ZOOM emotions» Савлайроссиялык проектлерининъ арт етекшиси, Пятигорск Моделининъ ООН 2020 эм 2021 халклар ара уйгынлавшысы болады. Руслан Янполов Пятигорск каласындагы патшалык йогары окув ошагында окыган уьш йылы ишинде «Артек» халклар ара балалар орталыгы ман озгарылган фестивалининъ призеры да болган. Ол сол йыллар ишинде Москва, Ставрополь калаларында озгарылган «Студентлер язлыгы» деген форумларда катнасып, савгалы орынларга етискен. Солай ок артта: ЮНЕСКО аты ман озгарылган «Евразия Globai» халклар ара яслар мерекели форумы, «Кавказ – оьрленуьв япсары» Сырт-Кавказ билимлендируьв проекти, «Грани молодежного лидерства: социальная активность, инновации, устремленность в будущее» яс лидерлер содружествосынынъ халклар ара форумы, «Байкал» яслар форумы, «Прогресс» студент самоуправлениесининъ оьрленуьвининъ эм байыр оьсуьвининъ савлай россиялык мектеби. Кайсы ерде катнасса да, ол оьзине тек пайдалы билимлерди алатаган эди.
Яс ердесимиз оьзи окыйтаган япсарда озгарылган «Лидер» шарасынынъ муниципаллык кезегинде енъуьвши де болган.
Руслан Алибек увылы оьзининъ терен билими мен эм алдыга ымтылысы ман оьзи окыйтаган патшалык йогары окув ошагындагы окытувшылар ман тар байланыс тутады. 2018–2020-ншы йылларда ол ректордынъ хош коьрип алувына шакырув алган. Олай дегенимиз, сол йолыгыска тек ийги белгилерге окыйтаган студентлер шакырыладылар.
Аьли де Руслан Янполовтынъ алдында студент йыллары бар, сол йыллар ишинде де ол бизди, оьзининъ ата-анасын эм ювыкларын етимислери мен суьйинтер.
Алдыда сондай ясларымызга тек алдыга ымтылыслары оьсип, салынган мыратлары толганды йорайман.
Г.Сагиндикова.
Суьвретте: Руслан Янполов анасы ман.
