«Ногайский район» МР аькимбасы Джамалутдин Эсиргепов Дагестан Республикасынынъ Халк Йыйынынынъ депутаты Мурзадин Авезов пан биргелесте Терекли-Мектеб авылынынъ дренажынынъ (ерди сувдан тазалав) мониторингин оьткерген. Аьлиги заманда авыл дренажынынъ экинши кесеги бойынша куллыклар тамамланып туры, бир шакырымнан аз ер тазаланмай калган. Экинши кесектинъ узынлыгы 13 шакырым болады, солардынъ 6 шакырымнан артыгы авылдынъ ишиннен оьтеди.
Тазалав ислер караша айдынъ басында битирилмеге ниетлениледи. Куллыкларды Бабаюрт районынынъ подрядный организациясы Ногай районынынъ Минмелиоводхоз филиалынынъ коьтергишлеви мен юритип туры.
Тазалав куллыкларын юритуьвде энъ де уьйкен маьселе – явапсызлы яшавшылар таслайтаган кокыс. Сол зат татавыллардынъ кир болувына келтиредилер, яман кокыстынъ ийиси шыгады, тоьгерек якты сасытады.
Сыйлы яшавшылар, бир-биримизге анъламлык пан, сый ман карайык, бу ерде бизге яшамага, балаларды оьстирмеге керек. Баьримиз де дуныя ийги болсын деп куллык этейик.