Янъыларда Кизляр районында биринши язлык субботник уйгынланып озгарылды. Тоьгеректи йыйыстырув баьри муниципаллык учреждениелерининъ эм организацияларынынъ куллыкшылары, авыл яшавшылары ортакшылык эттилер. Олар парклардынъ ишин, тоьгерегин, спорт эм ойын майданларын, ямагат ерлерин тазаладылар. Биринши болып, субботникке район администрациясынынъ ис коллективи, агашлык хозяйствосынынъ, Кизляр районы бойынша Россия ОМВД куллыкшылары шыгып, Новокахановка эм Красноармейский авылларында «Махачкала-Астрахань» федераллык коьлик юруьв йолы бойы ман юрип, кокысларды йыйнадылар. Солай болып, «Каспрыба» деген балык хозяйстволык ассоциациясы да Каспий тенъизининъ ягасында орынласкан Кизляр районындагы авылларында тазалав эм оны ярастырув бойынша субботникти уйгынлады.

Организациялар ваькиллери эм предпринимательлер яс тереклер шашылувына айырым эс караттылар. Район ерин тазалавда уьйкенлерге районнынъ билимлендируьв ошакларынынъ окувшылары да уьйкен ярдамын эттилер. Окытувшылар ман бирге балалар, тек мектебтинъ тоьгерегин йыйып калмай, оларга тапшырылган Уллы Аталык согысы, тарих эм маданият бойынша эстеликлерининъ, мемориалларынынъ тоьгерегин де тазаладылар.
Авыл аькимбаслары субботникти озгарувда керекли техника яраклары ман канагатладылар.
Кизляр районынынъ етекшилеви савлай район бойынша субботнигинде ортакшылык эткен баьри катнасувшыларына да разылыгын билдирди. Оларды мундай баславларында келеекте де оьз демевликлерин этпеге шакырды.
– Биргелес исининъ тамамын коьруьв савлайымызды да бек коьнъиллендиреди. Аьр ким де бу онъайлы иске оьз косымын этти.
Районнынъ аьр бир яшавшысына тувган авылы эм районынынъ ярасыклыгын эм тазалыгын саклавга каратылган иси уьшин уьйкен муьсиревимди билдиремен.
Сизинъ яваплы эм намыслы кепте ислевинъиз бен тоьгерек ягымыз коьпке таза эм ярасык болды, – деди субботникте ортакшылык эткенлерге разылыгын билдирип, район аькимбасы Аким Микиров.