Ногай районыннан толы болмаган мобилизация бойынша шакыртылган аьскершилер тувган ериннен келген посылкалар эм хатлар йиберуьвде катнасканларга разылык билдирдилер. Сондай билдируьвди Ногай районынынъ Хатын-кызлар советининъ председатели Асият Манкаева этти. Янъыларда совет агзалары ман аьскершилерге Янъы йылга зияпетлер мен посылкалар йибердилер. Балалар согыс спецоперациясынынъ катнасувшыларына йылы хатлар яздылар. Бу затларды Калининаул авылынынъ яшавшысы Мурзабек Кульдиев аькетти, ол давдан отпускка бир неше куьнге келген болган. Посылкаларды эм хатларды аьскершилер алдылар.

Дагестаннан кеткен аьскерши Азалия Эльгайтаровадынъ хатын окыды. 4-нши «в» классынынъ окувшысы булай язады: «Аманма, аьскерши. Бу хатымда мен сага уьйкен савбол айтаман. Биз парахат яшасын, окысын, уйкласын деп, ярык куьнге эм таза аспанга суьйинсин деп, сен бизим Аталыгымызды коршалайсынъ. Мен оьктемсиймен, сондай куьшли, йигерли инсанлар болганга. Сага, аьскерши, парахат службады йорайман, баьри кыйынлыкларды оьтпеге куьшинъ болсын». Аьскерши хатка бек суьйинди.
Ногай районынынъ Нариман авылыннан агалы-инили Руслан эм Ислам Абдулбариевлер толы болмаган мобилизация бойынша кырк кийик айында кеттилер эм оьз борышларын согыс спецоперациясында толтырып турылар. Русланга Милана Салыковадан хат келди, аьскерши тувган ериннен келген хатка бек суьйинди. Ол язады: «Аманма. Мен сага наьсип йорайман, сенде баьри зат та аьруьв деп сенемен. Бу йыл бек кыйын эди, эндиги йыл ийгиликлер аькелсин деп сагынаман. Биз классымызды Янъы йылга аьзирледик. Биз Карагас авылынынъ окувшылары ман йолыгыс этеекпиз. Коьп йыл яшанъыз, сизге наьсип йорайман». Руслан ногай тилинде халкына салам берди, тезден енъуьв мен уьйге кайтармыз деп айтты эм Миланага разылыгын билдирди. Уьйде оларды куьтедилер эм сенедилер.
Э.Кожаева, бас редактор.
Суьвретте: ердеслеримиз, СВО катнасувшылары.