Ветеринарлык кесписин, менимше, шынтылайын малды суьйген, онынъ акында яны ман каьр шеккен аьдем сайламага болаяк деп эсиме келеди. Ветеринар кесписин сайлаган аьдемлерде тыншаюв, байрам куьнлери болмайды, ол ис шакырувы бойынша дайым малдынъ ден савлыгын, онъайлыгын коршалавда турады.
Кизларханнынъ тенълери мектебти тамамлаган сонъ биреви – окытувшы, экиншиси – курувшы, уьшиншиси – врач, олардынъ арасында Кизлархан ветврач кесписин сайлап, яшавындагы оьз йолларын таптылар.
Кизлархан Кумлы авылынынъ Исмаил эм Рухиет Буланбаевлердинъ коьп балалы аьелинде доьртинши аьвлет болган. Ол 1963-нши йылдынъ канътар айынынъ 8-нши куьнинде тувган. Кумлы авыл мектебти етимисли битирген кыз коьп ойланып турмай, Махачкаладагы авыл хозяйстволык институтынынъ ветеринарлык боьлигине 1981-нши йыл туьсип, 1987-нши йыл оны етимисли тамамлаган.
Кизлархан Кумлы авылынынъ ясын юреги мен сайлаган Уллубий Муратов пан (яткан ери еннетли болсын) бактысын байлайды. Окувдан сонъ ветеринар кесписин байырлаган кыз Орлов областининъ Васильевка авылына куллык этпеге йибериледи. Яс аьелдинъ басы курылыс техникумын тамамлаган ян косагы Уллубий прораб, яс кыскаяклы ветеринар болып алыс болган ерде ис сулыбын алып баслайдылар. Орлов областинде уьш йыл куллык этип, тувган Ногай шоьлине кайтадылар. Баслап яс специалист Ленин атындагы совхозынынъ биринши боьлигинде, оннан сонъ «Кумлинский» колхозында куллыгын бардырады. Буьгуьнлерде сайлаган кесписи бойынша Дагестаннынъ Ногай районы бойынша управлениесининъ «Кумлинский» ветеринарлык участогында ветеринар врачы болып етимисли куллык этип келеди.
Мине ол оьз ис аьрекети бойынша булай хабарлайды: «Мен 36 йыллар бойы авыл хозяйствосында куллык этип келемен. Сол ис аьрекетине мени, бириншилей, авылыма, ериме, авыл хозяйствосына суьйим аькелди, деп ойлайман. Авадынъ кайдай аьллерине де, сувык, яллаган исси, явын-шашын демей шакырганга заманы ман аьр кимнинъ малына оьз колымнан келген ярдамымды этпеге шалысаман. Зарарлы мал авырувлардан, айтпага, (касарткы, шувалшаннынъ, бийттинъ) алдын шалув мырат пан авыл малларына вакцинация этемиз. Бизи мен малдынъ бруцеллез авырувына да уьйкен маьне бериледи», – дейди оьз ис аьрекети акында ветеринар врачы.
Агропромышленный комплекси тармагы бойынша коьп йыллык яваплылык пан толтырып келген исинде етимиси РФ Авыл хозяйстволык министерствосынынъ министри Д.Н.Патрушевтинъ атыннан Разылык хаты ман, Районнынъ социал-экономикалык оьрленуьвине уьйкен косымы уьшин Ногай район етекшилеви атыннан Сый грамоталарына тийисли этилген. Тувган авылында да, Дагестаннынъ Ногай районы бойынша ветеринарлык управлениесинде бирге куллык эткен ис йолдаслары арасында да Кизларханнынъ сыйы да, абырайы да уьйкен. Кумлы авыл яшавшылары да коьп йыллар бойы этип келген кыйыны уьшин ветврач кыскаяклыга аьр дайым да юрек разылыгын билдирмеге асыгадылар.
Сол тувыл ма аьдем уьшин наьсип дегенинъ! Сол сыйды ол кыркка ювык йыллар оьз уьстинликли иси мен халкына керек заманда ярдамга келуьви мен казанган.
Яны ман суьйген исинде уьлгили ис аьрекетшиси болып калмай, кыскаяклы ян косагы ман эки аьвлетлерин, Эльмира ман Ибрагимди, йогары билим берип, кенъ яшав йолына онълаган наьсипли ана да болады. Буьгуьнлерде тунъгышы Эльмира ян косагы Мурат пан алыс Мурманск каласында яшайды. Кала мектебинде английс тилиннен дерисин береди. Кедеси Ибрагим Астрахань каласында экономика кыянатшылыклар ман куьресуьв бойынша боьлигинде (УБЭП) етимисли куллык этип келеди.
Янъыларда Кизлархан Исмаил кызы 60 йыллык мерекесин аьвлетлери, балдан таьтли 5 уныклары эм йиенлери, кардаш-тувганлары арасында карсы алды. Биз де оны сыйлы мерекеси мен кутлап, берк ден савлык, ис аьрекетинде келеекте де бийик етимислерди йораймыз.
Г.Нурдинова,
РФ Журналистлер союзынынъ агзасы.
Суьвретте: Кизлархан Муратова.
