Быйыл 3-нши увыт айында СССР Суьвретшилер союзынынъ агзасы, Россия Федерациясынынъ ат казанган суьв- ретшиси, Дагестан Республикасынынъ ат казанган саниятлар аьрекетшиси, Россия суьвретлер академиясынынъ член-корреспонденти, суьврет ясав профессоры, Россия Театр аьрекетшилер союзынынъ эм Дагестан Суьвретшилер союзынынъ агзасы Абдулзагир Бозгитович Мусаев тувганлы 70 йыл толды.
А.Мусаев – коьп яклы суьвретши, онынъ яратувшылыгы Дагестаннынъ аьлемет маданиятынынъ классикалык уьлгилерининъ сырасында турады эм аьлиги замандагы Россия суьвретлер саниятында тийисли орынды алады.
Мусаевтинъ оьнери гуманизмге толы эм бийик ян-эдаплык байлыкларына таянады. Яшавда коьрген затын суьвретши йинъишке лирикалы метафораларына дейим коьрсетеди, аьдемнинъ ыспайлыгын болса ян эм шарктынъ гармониясы кебинде тергейди («Каьвмишлер карда», «Элегия», «Музыка», «Гейша», «Пайхамбар» триптихи).
Согыс куллыкшысы – аьскершидинъ йигитлигининъ курманлык табиатына эм оьмирли ана суьйимлигине багысланган онынъ «Эпитафия» деп аталган кенъ оьлшемли полотносы.
Халк маданиятынынъ йойылган белгилерин яшавга кайтара берип, А.Мусаев суьвретлев-монументальлик саниятынынъ оьзинше аьлемет коьрнекли уьлгилерин туьзеди.
Дагестаннынъ янъы тарихинде А.Мусаевтинъ уьйкен ямагат-маьнели куллыгы деп Махачкалада 2004-2007-нши йылларда Киели-Успен кафедраллык соборын безеклендируьв иси саналады. Бу яратувшылык иси россия халкларынынъ конфессиялар ара байланысларын беркитуьвде заьлимдей оьзгерис болды.
А.Мусаев – Дагестанда суьврет ясав аьрекетинде биринши профессор, Дагестан педагогикалык университетинде суьврет ясав саниятынынъ боьлигин туьзуьвши. Оьзининъ 30 йыллык педагогикалык аьрекетинде ол дагестан суьврет ясав саниятынынъ академиялык мектебин курган.
Суьвретшидинъ 80-нен артык куллыклары Москвада, Санкт-Петербургта, Россиядынъ баска калаларында сакланадылар эм коьрсетилинедилер. Солар Художестволар академиясынынъ музейинде, Россия Федерациясынынъ маданият министерствосынынъ йыйынтыкларында, Италиядынъ, Япониядынъ, Германиядынъ, Турциядынъ, Израильдинъ эм Бельгиядынъ байыр эм корпоратив коллекцияларында да коьрсетилингенлер. А.Мусаев 90-нан артык абырайлы выставкалардынъ катнасувшысы болады.
М.Юнусов.
Суьвретте: Абдулзагир Мусаев.
