Яс аьдемлердинъ яшавында Аталыкты коршалав заманы келеди, бу киели борышты ясларымыз элимиздинъ туьрли муьйислеринде йигитлик пен, эрклик пен толтырадылар. Бир йылдынъ ишинде яслар коьп затларга уьйренедилер, тек туьнегуьнлерде мектебти биткен балалар эр кисилер боладылар.
– Аьр бир эр киси Аталыкты саклав борышын толтырмага керекли, бу борыш тек патшалык алдында тувыл, оьз алдымызда. Кашан да, тувган еримизди, уьйдегилерди, тувган кардашларымды, досларымды сагынаман. Армия яшавга уьйретеди кайбиримизди, мунда алган сулып бек керекли болар деп шекленмеймен, – деп айтады аьскерши Ибрагим Сагиндиков. Асылы ман ол – Орта-Тоьбе авылдан. Мектебти битирген сонъ, Нефтекумск каласында нефтяной техникумда «Газ эм нефть скважиналарды казув» факультетин битирген.
Аьлиги заманда Ибрагим Почеп-2 каласында 23857 номерли артиллерия аьскерлер боьлигинде куллык этеди. Уьйде аьскершиди тетеси, анасы, эки карындаслары, тенъ-дослары куьтедилер. Оьзине берилген борышты Ибрагим яваплылык пан толтырады, йолдаслары, етекшилери арасында онынъ аты ийгилик пен айтылады. Анасы Альбина Зулькапий кызы увылы ман оьктемсийди, узактагы аьвлети уьшин юреги авырыйды, болса да ога аман юрсин деп тилек тилейди.
Рамиз Якубов Тарумов районынынъ Ново-Дмитриевка авылында тувып-оьскен. Мектебти битирип, яс Астрахань каласында автодорожный колледжге туьседи. Рамиздинъ атасы Амирхан Кидирали увылы полицияда куллык этеди, анасы Зарима Махмат кызы уьйшилик пен каьрлейди. Якубовлардынъ аьелинде эки увыл тербияланады. Атасы кеделерди йигерли, аьдил болмага уьйретеди, яшавда эр киси тек оьзин тувыл, баскаларды да коршалап болмага керек деп айтады аьвлетлерине.
Мектебте окыган йылларда Рамиз спорт пан каьрлейтаган эди, коьплеген грамоталар сынасларда онынъ енъуьвши болганын шайытлайдылар, окымыслы окувшы, ол берилген борышты яваплылык пан толтыратаган эди. Рамиздинъ суьйикли окув сабаклары физкультура эм математика эди. Буьгуьнлерде яс Оренбург областинде ракета аьскерлер сырасында куллык этеди.
Янъыларда Амирхан эм Зарима Якубовлардынъ атына аьскерлер етекшилериннен увылын ийги этип тербиялаганы уьшин разылык хат келди. Бу суьйинишли хабар баьримиздинъ де коьнъилин коьтереди. Савлай элимиз бен увыт айдынъ ишинде Аталыкты коршалавшы куьнин карсы аламыз. Сол куьн тек аьскерлер сырасында куллык этип турган ясларымызды тувыл, савлай эр кисилерди кутлаймыз, неге десе олар бу яшавда бизим тиревимиз эм коршалавшыларымыз боладылар.
Ибрагим эм Рамиз туьрли ерлерде оьссе де, туьрли ерде аьскершилер болып куллык этсе де, бир борышты толтырадылар – Аталыкты саклайдылар эм коршалайдылар. Мен олардынъ уьстинликлерине суьйинип, баьри ийгиликлерди сагынаман.
Г.Бекмуратова.
Суьвретлерде: И.Сагиндиков (солда); Р.Якубов.
