Йыл сайын увыт айдынъ ишинде Халклар ара ана тиллер куьни байрамшыланады. Бу куьнди Ногай район билимлендируьв учреждениелеринде ана тилине багысланган шараларды озгарув ман белгилейдилер. соьйтип, быйыл Терекли-Мектеб авылынынъ А-Х.Джанибеков атындагы мектебинде ногай тилининъ юмалыгы озды. Класс саьатлер, яттан ятлавлар окув конкурслары класслар бойынша озгарылды.
Соьйтип, 3-4-нши класслар ара озгарылган конкурс бек кызыклы болып оьтти. Окувшылар ногай тилинде ятлавлар окыдылар, олардынъ ишиннен енъуьвшилер белгиленди. 3-нши класслар бойынша биринши орынды Тангатаров Ассад, экинши орынды Асия Изеева алдылар. 3-нши орынды Амина Курбансаитова эм Айза Исламова боьлистилер. 4-нши класслар ара биринши орынга Карим Куруптурсунов тийисли болды, экинши орынды Шамиль Ахметов эм Альбина Курманова эм уьшинши орынды Малика Курганова эм Амина Мусакаева алдылар.
А-Х.Джанибеков атындагы мектебте биринши кере ногай тилинде «Тири классика» конкурсы озгарылды. Ярыска окувшылар бек ийги этип аьзирлендилер. Олар Ф.Абдулжалиловтынъ, С.Капаевтинъ, Б.Кулунча- ковадынъ, Я.Дильманбето- вадынъ шыгармаларыннан уьзиклер окыдылар. Конкурс сырагыларына коьре, биринши орынга – Амина Акболатова (6 «б» класс), Гузель Адильгереева (7 «б» класс), Амина Курганова (8 «в» класс), экинши орынга – Алима Лукманова (6 «б» класс), Луиза Кокешова (7 «в» класс), Айша Махмудова (8 «а» класс), уьшинши орынга – Альтаир Джумаев (6 «в» класс), Гульханум Максутова (7 «б» класс), Эдия Эспергенова (8 «а» класс) тийисли болганлар. Балалардынъ арасында ийгилерди китапхана куллыкшылары эм баслапкы классларда ана тил окытувшысы Р.Шоматова айырдылар.
А-Х.Джанибеков атындагы мектебте коьплеген йыллар артта Мурат Авезовтынъ «Бияла» пьесасы бойынша спектакльди орыс тилинде салган эдилер. Буьгуьнлерде бу пьесады ногай тилине коьширдилер эм пьесадан уьзиклерди коьрсеттилер. Мага, ногай тилинде шыгарылатаган республикалык газетадынъ журналистине эм ногай шаирине, балалар кайтип ийги этип ногайша соьйлегени бек ярады. Пьесадынъ аьр бир баьтири биялага карап, оьз ишки дуныясы ман каравшыларды таныстырды. Окувшылар Расул Аджибаев, Мамат Ахмаджанов, Азизат Аджигельдиева, Хансолтан Эсиргепов, Мухаммад Мусаев, Оьзбек Кадыров, окытувшылар Джамиля Залимхан кызы Койлакаева, Рысбийке Багувовна Шоматова, Куьмисхан Сулейман кызы Камалова, Эмире Мурат увылы Елакаев ийги этип коьрсеттилер оьз баьтирлерин сахнада. Шарады аьзирлевде салдарлы уьлис ана тил эм адабиат окытувшысы Зухра Умар кызы Мавлимбердиева эм мектеб китапхана куллыкшысы Гульнара Абубекер кызы Агаспарова костылар. Шара бек кызыклы болып оьтти.
Ана тилди саклав ниет пен мектебте коьп куллык этилинеди. Сол бек дурыс. Балалар ана тилинде окып та, соьйлеп те билмеге керек, тек сол заман бизим тилимиз де, халкымыз да сакланар.
Г.Бекмуратова.
Суьвретте: шарадан коьринис.
