Аьдемнинъ бактысы. Кайдай туьрли де болады, эки туьрли аьдемнинъ тувыл экеш, бир аьдемнинъ яшав оьмиринде кыйынлыклар да, яхшылыклар да, ак эм кара йолаклар да боладылар. Бир аьдем туьрли оьмирлерде де яшайды, олай дегеним, бир оьмир битпеге аз калганда тувганлар экинши оьмирге де шыгадылар, солай болганда ол туьрли яшавларды да коьрмеге амаллы болады.
Бизим конъысы Кизляр районынынъ Сангиши авылынынъ ясуьйкени Султанбек Кубалаш увылы Юлушев тап сондай наьсипли. Эки оьмирдеги яшавды коьрип келетаган инсан болады.
Султанбек-атайымыз узак- тагы 1926-ншы йылдынъ тамбыз айынынъ 15-нши куьнинде дуныяга энген эди. Онынъ тувган авылы Тырнамыш, бу куьнлерде ер юзиннен де йок болган. Ол тувган авылда мектеб те йок болган экен, ким биледи, белки, айлак кишкей авыл болгандыр яде билимли аьдемлер сол заманларда аз болгандыр, бу ерде тарихке кирип, теренлетип олтырмадым. Не болса да, буьгуьнги ясуьйкенимиз, шагы еткенде, конъысы Огузер авылына мектебке барады. Заманлар тыныш болмаган, балага, окып-язып уьйренер уьшин, бир авылдан баскага бармага туьскен.
Султанбек Кубалаш увылынынъ яшав оьмири енъил оьтпеген, ол каарлы согысты да коьрген аьдем. Онынъ юрегинде сол кыйынлы йыллардынъ ызлары калдырган яралар аьли де катпаган. Арада бир, эсине туьсип кетсе, оьзининъ кайтип етим болып калганы акында хабарлайды. Хабарлайды да, коьзлерин суьртеди. Онынъ атасы Харьков каласынынъ туьбинде болган согысларда йигитлерше ян берген. Султанбек-атайымыз оьзи де гитлерши Германияды енъуьв уьшин оьз уьлисин коскан аьдем. Ол оьзининъ тенълери мен согыс басланган йылларда тувган авылын явдан саклар ниет пен, тоьгерегин казувда катнаскан. 1943-1945-нши йылларда Султанбек Кубалаш увылы Кызыл Аьскер сырасында эр борышын толтырады.
Согыстан сонъгы йылларда да Султанбек Юлушев колхозда туьрли ис орынларда аьрекетин бардырады, авыл экономикасын туьзетуьв уьшин куллык этеди. Ол согыстан сонъгы йылларда Мадинат Ажгайтаровна Круптурсунова ман бас косып, аьел туьзеди эм Сангиши авылына яшамага коьшеди. Бу авылда ол ерлесип, бу куьнлерге дейим де яшап туры. Ол оьзининъ сайлап алган хатыны ман коьп йыллар татымлыкта яшады. Онынъ бу куьнлерде сегиз баласы эм солардан тувган баьриси етпис бес уныклары ман немерелери бар. Аьр бириси атайынынъ айткан соьзин ерге туьсирмей, аявлап турадылар. Тувган-кардашлары Султанбек Кубалаш увылы Юлушевти «тукым тамырын саклавшы» деп сыйлайдылар эм суьедилер. Ол оьзининъ 95 йыллык мерекесин белгилеп туры. Сондай ийги куьнинде оны Кизляр районынынъ аькимбасы Аким Микиров кутлап, Россия Федерациясынынъ Президенти Владимир Путиннинъ кутлавын эм ийги йоравларын еткерди.
– Токсан бес йыл яшав оьмирин суьруьв деген баьрине де берилмейди, бу яска етуьв уьйкен маьнели оьзгерис, Султанбек Кубалашевич, аьр бир куьнинъиз тек суьйиниш аькелсин, – деп оьзиннен де косты Аким Микиров.
Сыйлы ясуьйкенди Кизляр район аькимбасыннан баскалай, онынъ орынбасары Иса Рамазанов, Кизляр районынынъ УСЗН етекшисининъ исин кесек заманга толтырувшы Айшат Кадиева, Александрийский авыл поселениесининъ аькимбасы Микаил Гунашев эм бас специалисти Атикат Курбанова кутлап кеттилер. Келген конакларга оьзининъ ак юрекли разылыгын билдирип, сыйлы ясуьйкенимиз оьзининъ оьмирин оларга да йорады.
Г.Сагиндикова.
Суьвретте: Султанбек Юлушев аьел тоьгерегинде.
