Навруз айынынъ 31-нши куьнинде Дагестан Республикасынынъ Аькимбасы Сергей Меликов озган йыл ишинде Оькимет пен кайдай куллыклар этилгени акында регион парламенти алдында оьз доклады ман шыгып соьйледи.

Регион басшысы энъ де актуальли соравларды ортага салды, аьр бир сорав бойынша ведомстволардынъ эм министерстволардынъ куллыгын белгиледи эм келеектегиге планлар салды. Сергей Алимович оьз докладында этилинген ислерге баасын берип, кемшиликлерди де коьрсетти. Онынъ айтувы ман, етиспевликлерди тайдырмага керек. Республика Аькимбасы коьтерген соравлар ишинде туризмди оьрлендируьв соравы да бар эди.
– Озган йылдынъ ишинде Дагестанда миллионнан артык туристлер болганлар. Быйыл бу сан экиге дейим оьспеге болады эм бизден яваплылыкты талаплайды. Коьп куллыклар этилинмеге керек – инфраструктурады оьрлендирмеге эм келетаганлардынъ кавыфсызлыгын аьжетсизлемеге. Конаклар бизде парахат ял алсын деп бизге баьри амалларды да туьзбеге керек. Сондай амалларды коьрмеге суьйген аьдемлерге баьри коьмек те этилинеек. Буьгуьнлерде болса, бизде конаксуьерликтен баска бир зат та йокка эсап, – деп айтты Сергей Меликов.
Дагестан Республикасында кайдай ярасык ерлер бар – бийик тавлар, йогарыдан агып турган сувлар. Конак- суьерлик – дагестанлылардынъ энъ де бас касиети, ама кайбиримиз де конакларымыз бизим ерде оьзлерин парахатлыкта сезгенин суьемиз.
Туризмди бизим Ногай еринде де оьрлендирмеге амаллар бар. Район еринде арша орманлык (Можжевеловая роща) бар, кайдай ярасык болады шоьлимиз язлыкта. Ат саклайтаган хозяйстволар да бар районда, келген конакларга шоьлимизди коьрсетпеге болады. Терекли-Мектебке кирип турган ерде Конак уьй бар, мунда туье эм баска шоьл айванлар саклайдылар. Соьйтип, Дагестаннынъ ийги атын коьтеруьв уьшин туризмди республикамыздынъ аьр бир муьйисинде оьрлендирмеге болады. Сол борышты регионымыздынъ Аькимбасы биринши орынга салады.
Г.Бекмуратова,
Дагестан Республикасынынъ ат казанган маданият куллыкшысы.