Янъыларда Турция элинде, дурысын айтканда, Чифтликей районынынъ Ялова каласында, Туьрк маданиятынынъ халклар ара организациясынынъ уйгынлавы ман, уллы ногай халкымыздынъ талаплы кызларынынъ бириси, атаклы шаиримиз Кадрия Темирбулатовадынъ бюсти ашылды. Бу ерде айтып озбага керек болады, 2019-ншы Кадриядынъ мерекели йылында, биз йогарыда айтып билдирген организациясы ман, Анкара, Адана, Эскишехир эм Ялова калаларында ога багысланган коьп эстеликли шаралар озгарылган эди. Солай ок, 12 туьрли тюрк тиллерге онынъ шыгармалары коьширилип, китап баспаланып, дуныя ярыгын коьрди, Кадрия атындагы орамы Турция Республикасында ашылды эм онынъ бюсти олтыртылаяк постамент аьзирленген эди.

Буьгуьн болса, ногайымыздынъ талаплы скульпторы эм суьвретшиси Кошали Зарманбетовтынъ куьш салувы ман Кадриядынъ бюсти езден ясалып, белгиленген ерде орын алды.
Ногай халкына уьйкен сый этип, Турция еринде Кадриядынъ эстелигининъ ашылувына багысланган шарада Россия илмилерининъ академиясынынъ федераллык тергев орталыгынынъ Гамзат Цадаса атындагы саниятлар эм адабиат эм тил фольклор институтынынъ тамада илми куллыкшысы, доцент, филологиялык илмилерининъ кандидаты Фания Кусегенова, Карашай-Шеркеш Республикасынынъ ат казанган скульпторы, Кадриядынъ бюстин ясаган Кошали Зарманбетов, Дагестан Республикасынынъ ат казанган маданият куллыкшысы Бегали Куруптурсунов эм Кадриядынъ йиени Эдиль Аджибаев ортакшылык эттилер.
Россия элиннен барган конакларды Турция Республикасында Ялова каласынынъ муниципаллык туьзилисининъ етекшиси Али Мурат Силпагар, ТЮРКСОЙ Халклар ара организациясынынъ секретари Дюсен Касеинов эм баскалар хош коьрип алдылар.
Кадриядынъ эстелигининъ ашылувына багысланган шарады аша келип, Али Мурат Силпагар атаклы шаирдинъ савлай тюрк дуныясына белгили экени, онынъ ятлавлары коьплеген тиллерге коьширилгени акында айтып кетти.
Дюсен Касеинов болса, оьз соьйлевинде, дуныядагы кыйынлы аьллерге карамастан, келген конакларга оьз разылыгын билдирди. Россия элининъ Ногай районыннан барган конаклардан Фания Кусегенова савлай ногай миллетли халктынъ атыннан туьрк халкына уьйкен саламды еткерип, «Ногайский район» МР администрация аькимбасы атыннан да уьйкен разылыгын билдирди.
Кадриядынъ савлай тайпа-тамыры атыннан, сондай уьйкен сый уьшин, Дюсен Касеиновка эм Али Мурат Силпагарга оьлшемсиз уьйкен савболсынын айтты. Солай ок, Фания Кусегенова Турция Республикасына бос бармады. Ол Дюсен Касеиновка эм Али Мурат Силпагарга янъыларда дуныя ярыгын коьрген, Кадрия Темирбулатовадынъ уьш топламалы китабин савгалады.
Оннан баскалай, мунда коьп уьйкен болмаган концерт программасы да болды. Кадриядынъ эстелигининъ ашылувына багысланган шара Ялова каласынынъ Маданият орталыгында бардырылды. Мунда болса, туьрк элининъ ногай миллет маданиятын сыйлаганлар эм суьйгенлер суьвретши эм скульптор Кошали Зарманбетовтынъ оьнер усталыгы ман ясалган суьвретлер выставкасына шайыт болдылар. Бу ерде айтып озбага керек болады, Кошали Зарманбетовтынъ суьвретлери, баьри асарлары коьплеген россиялык эм халклар ара фестивальлерде ортакшылык этедилер.
Солай ок, Кошали Зарманбетовтынъ уьйкен выставкасы Халклар ара организациясынынъ штаб-квартирасында, Анкара каласында да озгарылды.