Оьткен юма ишинде муниципалитет администрация меканында «Ногайский район» МР 7-нши кере шакыртылган Депутатлар йыйынынынъ кезексиз 52-нши сессиясы болып озды.

Сессия кенъесин район йыйынынынъ председатели Рустам Байманбетов юритти. Ол депутатларды сессиядынъ бираз туьрленислер киритилген ис куьнделиги мен таныстырды. Район парламентарийлерге Ногай районынынъ социал-экономикалык оьрленуьвинде этилинген коьмек уьшин Дагестан Республикасынынъ Аькимбасы Сергей Алимович Меликовка эм ДР Оькиметининъ Председатели Абдулмуслим Мухудинович Абдулмуслимовка «Дагестан Республикасынынъ Ногай районынынъ сыйлы гражданини» деген атка тийисли этуьв соравларды ойласувга салмага маслагат этти. Рустам Байманбетов белгилегенлей, районда ийги як туьрленислер орын табувда республика Аькимбасы Сергей Меликовтынъ эм республика премьери Абдулмуслим Абдулмуслимовтынъ коьп кыйынлары бар. – Стадионлар, киши футбол майданлары, авыл маданият уьйлери курылады, авылларды газ бан канагатлав иси оьз йорыгы ман барады. Бу баьри зат республика власть ягыннан коьмек этуьв эм биргелес аьрекет юритуьв аркасы ман етисиледи, – деп белгиледи Р.Байманбетов. Депутатлар онынъ ойы ман макул болдылар эм сыйлы атка тийисли этуьв акында токтасты бир тавыстан якладылар. Солай ок депутатлар етим А.Кургановка социаллык найм турак уьйди приватизация этуьв акында соравды якладылар. Ногай район еринде архитектуралык тергев акында положениеди беркитуьв мен байланыслы сорав бойынша архитектура эм ЖКХ боьлигининъ алды орындагы (ведущий) специалисти Кульсим Умарова шыгып соьйледи. Онынъ белгилеви мен, муниципалитет администрациясынынъ исинде приоритетли соравлардынъ бириси – тоьгеректеги ердинъ онъайлыгы эм санитарлык аьли. Боьликтинъ бас куллыгы яшавшылар ман эм организациялар етекшилери мен меканды эм тоьгерегиндеги кулланылатаган ерди тазалыкта саклавга, меканнынъ алды бетин ремонтлавга эм янъыртувга, кокыс уьшин контейнерлик майданларды ярастырувга, санкцияланмаган кокыс таслав ерлерди тайдырувга, орам йолларын ремонтлавга эм тоьгерек якты ясылландырувга каратылган. Депутатлар ДР «Ногайский район» МР ерлерин ярастырув эм тийисли аьлде саклав ман байланыслы янъы йорыкларды кабыл этип алдылар. Р.Байманбетов Депутатларга Дагестан Республикасынынъ «Ногайский район» МР Депутатлар йыйынынынъ Регламентине туьрленислер киритуьв бойынша сорав акында билдирди. Энди, киритилген туьрленислер мен келисте, район йыйынынынъ председатели дайымлык негизинде куллык этеек.