Дагестан Республикасынынъ Аькимбасы Сергей Меликов регион уьшин энъ актуальли соравлар бойынша кенъес озгарды. Олар республика яшавшыларын исси сув ман, ягарлык эм электроярык пан канагатлав, солай ок коронавирус инфекциясына карсы йорыкларды тутув ман байланыслы.

Бас деп ДР регионы ман етекшилейтаган Орталык 23-нши ноябрьден 13-нши декабрьге дейимги болжалда аянланган маьселели соравлар, солай ок олардынъ шешуьв йоллары ойласылды. Регионаллык Орталыктынъ етекшиси Магомедсултан Абдуралимовтынъ билдируьвине коьре, сол белгиленген болжал ишинде уьш мынънан артык гражданлардынъ керексинуьвлери мен байланыслы соравлар ойласылды, олардынъ коьбиси – Махачкала, Каспийск, Хасавюрт эм Дербент калаларыннан. Боьтен де яшавшыларды оькимет ягыннан этилетаган социаллык ярдам, тийисли пособиелердинъ кешиктирип берилуьви, электроярык, сувык сув ман канагатлав йоклыгыннан туватаган соравлар тынышсызландырады.
Социаллык тоьлевлер кешиктирип берилетаган ман байланыста Дагестан Аькимбасы ДР Ис министерствосынынъ етекшилигиннен анълатувды талаплады. 3 ясыннан 7 ясына дейимги балаларга берилетаган тоьлевлер акында айта берип, министрдинъ биринши орынбасары Ибрагим Зайналлаев белгиленген федераллык амаллар толы оьлшеминде яшавга шыгарылганын белгиледи, солай ок финанс амаллары (600 млн. маьнет акша кадери) етиспейтаганы акында да айтты.
Республика Аькимбасы министерство ваькилининъ мынълаган дагестаншылардынъ социаллык яктан канагатлавы ман байланыслы соравлар йыл бойынша неше кере де коьтерилгенин эсине салды. «Аьдемлерди министерство не шаклы акша шыгарганы кызыксындырмайды, оларга бек маьнели сол тоьлевлерди заман-заманы ман алганлары. Сиз йылдынъ ызында Орталыкка ярдамын тийгистпеге тилек салувынъыз бан кешиккенсиз», – деди ол.
Южно-Сухокумск, Махачкала эм Каспийск калаларынынъ коьп квартиралы уьйлери коммуналлык яктан аьжетсизленуьви йоклыгы ман байланыслы маьселе акында оькимет турак уьйлер Инспекциясынынъ етекшиси Сергей Касьянов айтты. Онынъ билдируьвлерине коьре, Южно-Сухокумск каласынынъ Буйнакский орамындагы 13-нши номерли уьйининъ 25 квартираларында байыр йылытув алатлар салынган, ети квартираларда йылытув алатынынъ монтажы тамамланады.
Сергей Меликов ЖКХ тармагында маьселелер туватаганы уьшин калалар аькимбаслары байыр яваплылык тутатаганы акында эсин каратпага кереклигин белгиледи. Гражданлардынъ баьри соравларын да Янъы йыллык байрам куьнлеринде ойласпага шакырды. «Янъы йылга дейим эки юмадан бираз заман калган. Аьдемлер оны байрамша, маьселелерсиз йолыкпага суьедилер. Сонынъ уьшин буьгуьнги коьтерилген соравлар бойынша аян шаралар коьрмеге тилек саламан. Юма ызында мен аьдемлер QR-кодлары ман кайтип пайдаланатаганы акында билмеге суьемен, неге десе байрам алдында олар туькенлерге тез-тез келееги аян», – деп тамамлады соьзин Сергей Меликов.