Янъыларда КПРФ Ногай район комитетининъ келеяткан куьзги парламент сайлавлары ман байланыслы аьлде кезекли пленумы болып озган.
Район коммунистлерининъ форумында Дагестан Республикасынынъ Халк Йыйынына депутатка кандидатларды айырув эм куьн йосыгындагы баска соравлар ойласылды.

Пленумды оьз доклады ман ДР Халк Йыйынынынъ депутаты, КПРФ Дагестан рескомынынъ секретари, Ногай РК 1-нши секретари Мурзадин Авезов ашты. Онынъ соьзине коьре, КПРФ Дагестан рескомынынъ ызгы йыйынында быйыл 19-ншы сентябрьде РФ Федераллык Йыйынынынъ Государстволык Думасына эм Дагестан Республикасынынъ Халк Йыйынына депутатларды сайлавларда дагестан коммунистлерининъ катнасувы акында карар кабыл этилинген.
Мурзадин Авезов республика парламентинде коммунистлер фракциясы аз санлы болганына карамастан, коьп маьнели маьселелерди белсенли коьтеретаганын белгиледи. Солардынъ ишинде социал-экономикалык соравлары да бар.
– Бизим сайлав округымыздан ДР Халк Йыйынынынъ депутатына кандидатлар этилинип КПРФ Ногай РК атыннан Абрек-Заур Лукманов, Темирхан Сатыров, Рамазан Кошекбаев айырылганлар, – деди Мурзадин Авезов.
Райком басшысы эндиги 2022-нши йылда район партия организациясы туьзилгенли 30 йыллыгын белгилеегин билдирди. Сога, деди ол, быйыл октябрь айыннан алып аьзирлик коьрип баслав керек.
Пленумда оьз ойлары ман Абрек-Заур Лукманов, Карагастан Темирхан Сатыров, Карасувдан Оразали Копиев боьлистилер.
Пленумда «Шоьл тавысы» республикалык газетасына язылув акында сорав коьтерилди. Мурзадин Авезов ана тилимиздеги баспа изданиесине язылув – ол аьр бир коммунистке миллет борышы болады эм аьр ким де сога язылмага керегин белгиледи.
М.Юнусов.