Янъыларда Астрахань областининъ Приволжский районынынъ Три Протока авылынынъ касында XIII Савлайроссиялык сабантой байрамы шатлыклы аьлде уйгынланып оьтти.
Шатлыклы шарады кутлав соьзи мен Астрахань областининъ губернаторы Игорь Бабушкин ашты. Ол XIII Савлайроссиялык сабантойын аьзирлевде эм озгарувда оьз уьлисин коскан уйгынлавшыларга уьйкен разылыгын билдирди. Солай болып, Игорь Бабушкин мундай уьйкен байрамды Астрахань областинде биринши болып йолыгув уьйкен сыйга тийисли деп белгиледи. Келеек йыл XIII Савлайроссиялык сабантойы Пермь крайында озгарылаягы эм Астрахань регионы да сол байрамда катнасаягын айтты.
Астрахань областине Россиядынъ 30 регионларыннан, айтпага, Башкортостан, Дагестан, Калмыкия, Краснодар эм Ставрополь крайларыннан, Оренбург, Псков областьлер ваькиллери конакка келген эдилер. Байрамда Этно юрты да аьрекет этти. Онда ногай, туркмен, казах, татар, калмык, орыс миллетлер майданларында конакта болганлар аьр бир халктынъ акында ювык таныспага, олардынъ акында билимлерин теренлетпеге амал таптылар. Сол миллет майданларда аьр бир халк оьз маданияты, яшав турмысы, аьдетлери, миллет кийимлери, туьрли аслары, зияпетлери, ойынлары акында баска халкларга коьрсеттилер. Баска халклардай болып, ногай миллет майданында ерлескен термединъ ишин ногай халкынынъ аслары, кийими, кыскаяклылар ярасыклавлары, миллет саз алатлары, савыт-садагы, байрагы эм сондай баска затлары ярасыклаган эдилер.
Ногай миллет майданына келген конакларын ногай халк маданияты ман «Тулпар» халк биюв ансамблининъ, карагаш ногайларынынъ фольклор этнографиялык «Дослык» ансамблининъ катнасувшылары эм сондай баскалар таныстырдылар. Олар миллет кийимлеринде ногай тилинде «Авылым», «Орайда» эм сондай баска туьрли йырларын, биювлерин оьнерли бийип коьрсеттилер.
Айтпага, байрам конакларынынъ коьнъилин Дагестаннан келген аркан уьстинде юретаганлар да оьз оьнерлери мен таныстырдылар. Баска болып, Савлайроссиялык сабантойына йыйылганлар спорт базласувларын, ат, туье шабысларын, кызыклы миллет ойынларын карап, заманларын пайдалы озгардылар. Туьелер шабысында бас савгасына (100 мынъ маьнет) Калмыкиядан келген Д. Дюсенбаев тийисли этилди.
Байрамнынъ спорт ярысларында 20 регионларыннан 70 спорт- сменлери ортакшылык эттилер. Сол спорт ярысынынъ катнасувшысы Татарстаннан Р.Нургалиев чемпион атына тийисли этилип бас савгадынъ (автокоьлик) иеси болды.
Соьйтип, Астрахань областинде оьткен уьйкен сабантой коьпмиллетли халклары уьшин маьнели, коьнъиллерди коьтерген, халклар ара дослык коьпирин салган байрам болып оьтти.
Г.Нурдинова.
Суьвретте:байрамнан коьринис.