Ердесимиз, оьзининъ ис борышын Сахалин областининъ Южно-Сахалинск каласында толтыра келип, Украина еринде озатаган согыс спецоперациясында катнасып эм элимизге енъуьвди ювыклатувына оьз косымын этеди. Ол Ногай районымыздынъ Нариман авылынынъ яс йигити Заурхан Имбет-Али увылы Кувандыков болады.
Заурхан согыс спецоперациясында сегиз ай узагында болып, бу куьнлерде тийисли тыншаюв болжалында. Ол бизге сол ерлердеги урыслар, оьзгерислер акында коьп хабарламага суьймеди, ама яслар оьз элин коршалавга шыкпага борышлы эм сол олардынъ киели аманаты экенин ийги этип анълатып айтты.
Заурхан оьзининъ эр борышын Калужская областининъ Козельск каласында толтырган. Оьзининъ билдируьви мен, сол йылларда ол кызмет кылган аьскер боьлигининъ етекшилери ога, ис борышты сонда бардырмага тилек салган болганлар, ама сол заманларда, Заурханда бу тармакта куллык этпеге ниет болмаган. Коьресизбе, йыллар оьтсе де, ол бу тармакка кайтып, ис аьрекетин бу куьнлерде уьстинликли бардырады. Сайлаган кесписи оьзине ярайды эм, эл шакырса, дайым соны коршалавга аьзир экенин де йигерли кепте айтады.
Заурхан Южно-Сахалинск каласынынъ бир аьскер боьлигинде контрактлы службасын автокоьлик айдавшы болып бардырады. Согыс спецоперациясы озатаган япсарга да ол коьлик айдавшы кебинде кеткен. Онынъ бас борышы – урыслар озып турган ерге аьскершилерди кавыфсыз еткеруьв.
Оьзек те, ис борышы енъиллерден тувыл. Заурхан согыс спецоперациясы озатаган ерлерге келгенлей ок, ол бу ерде болмага эм элди коршалав керек экенин аян анълады, артка кайтув йок, бу кеспиди сайлаганына бир де оькинмеди.
–Биз –аьскершилер эм, бу ерде оьз аьрекетимизди бардыра келип, Россия Федерациясынынъ Президенти Владимир Путин Украина ерининъ (алдын, аьли Россиядынъ япсарларын) тынышлы яшавшыларын нацистлердинъ эзиетиннен коршалавга шыкканын бек дурыс коьремиз, –дейди Заурхан Кувандыков.
Кайдай кыйынлык болса да, аьр кайсы аьдемге де тувган кардашлардынъ сени куьтуьви, саклавы, солардынъ тилеклери сага дем береди деген соьзлердинъ акыйкатлыгын баска туьскенде анълайсынъ. Заурханга да анасынынъ, аьптесининъ эм аданасларынынъ, оьз аьелининъ тилеклери етедилер эм баьлелерден саклайдылар.
– Аьр бир аьскершиге, боьтен де, согыс майданда болган заманларда уьйдеги аявлы аьдемлердинъ тынышлы яшавы маьнели эм солар ман йолыгыс акында ойласанъ, яшавга сениминъ де оьседи, – дейди ол.
Заурхан согыс спецоперациясына кеткенше, онда эки увыл бар эди, артка кайтканда, оны янъы тувган кызы да саклап турды. Сол ога уьйкен куьез болды.
Оьзек те, согыста кыйынлы ерлер де болады, йолдасларды йойыткан заманлар да болып кетеди.
Бир кере онынъ автокоьлиги каты урыслар арасында да калды. Тек сонынъ акында Заурхан хабарламага суьймеди. Биз оны анълаймыз: согыс майданда калган йолдаслар, солардынъ тек яркын келбетлери эсте каладылар аданасларынынъ…
Энди бир затты да артка кайтарып болмайсынъ.
Бу куьнлерде болса, Заурхан сайлаган кесписи мен, оьз бактысы ман бек разы.
–Эгер мени ис аьрекетиме коьре, тагы да сонда шакырса, мен бир артыма да карамай кетеекпен. Дайым оьзимнинъ аьрекетимди тынышлы яшав уьшин бардырмага аьзирмен, – дейди йигитимиз.
Биз ога тек ден савлыкты эм элимизде тынышлыкты йораймыз.
Галима Курганова.
Суьвретте: Заурхан Кувандыков