Ногай район орталыгы Терекли-Мектеб авылында оьткен уллы юма куьн авыл хозяйство ярмаркасы болып оьтти.

Ярмаркада районнынъ айырым фермер хозяйстволары ман предпринимательлери ортакшылык эттилер. Авыл яшавшыларына рынок бааларыннан тоьмен баалары ман азык-туьлик продукциясы сатылды.
Сол куьн, оькинишке, ава аьллери мен байланыста хыйлы район фермерлери ярмаркага келип болмадылар.
Ярмаркада Куьнбатар авыл, Бажиган участогынынъ эгинши-фермер хозяйстволарынынъ басшылары Рамберди Койлакаев, Мурат Баймурзаев, Магомед Гуммаев, агалы-инили Абдулла эм Рамазан Абдуллаевлер эм Кумлы авылындагы «Фаризат» ОПК куллыкшысы Темиргали Танашев оьзлеринде оьстирилген кой эм тувар малдынъ этлерин 350-380 маьнетке саттылар.

Ерли яшавшылар, солай ок, Терекли-Мектеб авылдынъ эт комбинатында аьзир этилинген туьрли толтырмалар да сатып алдылар. Червленные Буруны авылдан предприниматель Мурзабий Дуйсенбиев ералма, соган, емис продукциясын сатты.
– Буьгуьнлерде Куьнбатар эллерининъ Россияга карсы киргистип турган экономикалык санкцияларыннан себеп азык-туьлик товарларынынъ оьлшеми элимизде кемимесин, соларга баалары оьспесин деген маьселе маьнели болады. Бизим Ногай районында аьли уьшин ерли авыл-хозяйстволык продукциясы керек шаклы етиседи, соларга баалары арткандай тувра себеплер йок деп беркитип айтамыз, – деди Ногай районынынъ Авыл хозяйство управлениесининъ начальнигининъ орынбасары Яхья Караев газетамыздынъ хабаршысына.
М.Юнусов.
Суьвретте: ярмаркадан коьринис.