Россия Президенти Владимир Путиннинъ Украина еринде согыс операциясын оьткеруьв акында карары ДНР эм ЛНР яшавшыларын коршалав, бу элде тынышлыкты токтастырув, Россияга карсы каратылган кавыфлыкты тайдырув мырат пан алынган. Сонынъ акында Ногай район Ямагат палатасынынъ председатели Эльмурза Саитов оьз ойын айтады.

– Россия Президенти Владимир Путиннинъ Украинада айырым согыс операциясын юритуьв акында кабыл эткен карарын толысынша яклайман. Патшалыгымыздынъ етекшисининъ сондай карары заманы ман эм баьри ягыннан да ойланып алынган деп санайман. Россияга тек Донбасс республикаларына карсы тувыл, ама соны ман бирге элимиздинъ суверенитетине тувра каратылган кавыфлыкты дипломатиялык йорык пан тайдырув уьшин бир йол да калдырмадылар. Украина сол шаклы заман ишинде оьз еринде тынышлык болганын суьймеди, эндигиси оны сога куьш пен келтирмеге туьседи.
Дурыс, США эм Куьнбатар эллери Россияга карсы уьйкен санкциялар киргистип келедилер эм аьли де киргистуьвде. Болса да, патшалыгымыздынъ етекшилери бу затка тийисли явап кайтарармыз деп беркиттилер.
Биз Украинады оьзимизге бойсынтпага яде онынъ ерлерин басып алмага шалыспаймыз. Бизим етекшилеримиз бу бизге конъысы элде тынышлык эм оьрленуьв болганын суьедилер. Эгер Президент Путин болмаган болса, келеекте элимиздинъ япсарларында тап атом савыты ман яракланган националистлер бизге карсы шыгаягына шек те йок эди. Ондай кавыфлыкты тайдырмасак болмайды, – деген Эльмурза Саитов бизим хабаршымызга.