Быйылгы аьскерге шакырувдынъ язлык кезеги кутылмага бир айдан да аз заман калып туры. Сол заман басланганнан алып буьгуьнлерге дейим Россиядынъ баьри регионларында да ерли военкоматлардан повесткалар алган юзлеген эм мынълаган яслар Савытлы куьшлер сырасын толтырып барадылар. Аьскершилик куллыгы аьлиги заманда тек борыш эм сый болып калмайды, ол коьплеген ясларга, олардынъ касиетин эм эркин шыныктырып, алдыдагы яшавына, сав бизим элимиздинъ келеектегисине кенъ капыларды ашады.
Аталыгы алдында яс гражданлардынъ борышы акында оьзининъ ойы эм буьгуьнги призывниклерге каратылган йоравлары ман Терекли-Мектеб авылынынъ «Ногай Эл» балалар бавынынъ тербиялавшысы Джамиля Аманбаева боьлиседи.
– Бизим шоьл халкымызда уланлар, кеделер тувгандай болса, соны ман байланыслы алтын соьзлер айтылып келген. Айтпага, «Эр йигит эли уьшин тувады», «Эр кадирин эл билер», «Эр кайратланса, экев болар» эм сондай коьп баскалары. Бурынгы шаирлер, йыравлар тувган ерин явдан коршалаган халк баьтирлерине багыслап сав уьйкен дестанлар, эпос йырларын шыгарып калдырганлар. Солар ман байланыста ата-бабаларымыз ясларда тувган ерине суьйимликти, куьшли эм шынты эр болмага ымтылысты, оьз халкына эм Тувган Элине тийисли уланлар болып оьсуьвди тербиялаганлар.
Буьгуьнлерде де, соннан коьп оьмирлер оьтип, увыллар эндиги де тек оьз ата-аналарынынъ эм кардаш-ювыкларынынъ да тувыл, ама сав патшалыгымыздынъ, бизим уьйкен уллы Россиядынъ таявы эм тиреви болып каладылар. Армияда бизим аьлиги заманларда тек эрлер тувыл, кызлар ман хатынлар да куллык этедилер, олардынъ хыйлысы оькимет савгаларына да тийисли болганлар. Сонынъ уьшин яслар аьскер сырасына барувдан басын акашпага керек тувыл, сондай кызлардынъ янында юргенде кызармас уьшин олар халкы эм эли алдында оьзлерининъ конституциялык борышын толтырмага тийисли.
Колларына повесткалар алып, белгиленген заманга военкоматларга келген эм буьгуьнлерде Аталыкты саклавшылар сырасына турмага аьзирлик коьрип турган кеделерге уьстинликлерди, берк ден савлыкты, коьтеринъки шат коьнъилди, оьз ата-аналарын, ата юртын мутпасынлар деп йорайман. Аьр куьн де телефон ман аналарынъыздынъ амашлыгын билинъиз, ийги кепте аьскер борышынъызды толтырып, бир йылдан тувган еринъизге кайтынъыз. Биз сизди куьтемиз, яслар! – деген газетамыздынъ оьз хабаршысына Джамиля Аманбаева.