Бу куьнлерде, муннан 75 йыл артта Берлиннинъ ювыгындагы Карлсхорстта немец-фашист Германиясынынъ аьскерлерининъ етекшилери оьзлерининъ капитуляциясына колларын басканлар. Соны ман 1945-нши йылдынъ 9-ншы курал айы Енъуьв куьни деп белгиленген.

Соьйтип, совет халкынынъ немец-фашист баскыншыларына карсы юритилген Уллы Аталык согысы уьйкен Енъуьв мен кутылган. Оьткен согыс дуныяда энъ де уьйкен эм кан тоьгисли деп саналады. Ол совет халкынынъ 27 миллион аьдемлерининъ яшавын курманлаган, мынълаган авыл-калаларды бузгышлаган, элимизге сансыз коьп йойым аькелген. Биз, аьли яшап турганлар, сол авыр йылларды эсимизде оьмирлер сакламага борышлымыз!

Бизим Тувган Элимиздинъ эркинлиги эм бойсынмаслыгы уьшин янларын берген баьтирлерге оьмирлик данък!

Согыстан кайтып келип, коьп йыллар элимизди аякка тургызув эм оьрлентуьв уьшин ислеген эм буьгуьнлерде арамыздан тайган йигитлерге – оьмирлик данък!

Баьри совет халкы ман бирге Уллы Енъуьвимизди ювыклаткан кайратлы тыл куллыкшыларына – оьмирлик данък!

Савлайы дуныя уьстинде оьлшемсиз уьйкен халк йигитлигининъ, тувган Аталыкка дайымлык алаллыктынъ эм эстеликли кайгыдынъ уьлгиси болып яркыраган бизим оьлимсиз Уллы Енъуьвимизге – оьмирлик данък!