Муннан 80 йыл артта, 1942-нши йылдынъ 15-нши октябринде Караногай (Ногай) районы немец-фашист баскыншыларыннан босатылынган. Душпан Караногай еринде 4 айга ювык заман болган. Сол кыйынлы айларда ногай халкы оьзининъ Элине, ерине суьйимин толысынша коьрсеткен. Караногай яшавшылары бир куьн де, бир такыйка да Кызыл Аьскердинъ куьшинде шекленмегенлер эм Совет Союзы согыста енъуьвши болаягына сенуьвин йоймаганлар.
Янъыларда Ногай район уьлке танув музейинде яс несилди патриотлык яктан тербиялав ниетте, А.Джанибеков атындагы мектебининъ 9-ншы класс окувшылары ман йолыгыс уйгынланды. Шарада Ногай район Хатын-кызлар советининъ председатели Асият Манкаева белсенли катнасты.
Шарады уьлке танув музейининъ етекшиси Каирбек Бальгишиев ашып, юритти. Ол балаларга Караногай еринде, муннан 80 йыл артта, болган йигитли оьзгерислер акында айтып озды. Солай ок Каирбек Бальгишиев Караногай еринде аьрекетлеген партизан отрядлары алдына салынган борышлар акында хабарлады. Онынъ соьз- лери мен, Караногай районына немец-фашистлери киргенше, мунда эм онынъ касындагы районларда, солай ок Ставрополь крайында, партизан отрядлары туьзилген болган. Караногай районына явдынъ бек коьп аьскершилери кирген. Соьйтип, кайдай кыйын салув аркалы, партизан отрядлары оьзининъ алдында салынган борышты толтырганлар. Олар Караногай еринде асылланган малды баска якларга айдап аькетуьвде куьш салганлар, соьйтип малды явдынъ колына туьсирмегенлер.
Йолыгыс барысында окувшылар Уллы Аталык согысында катнаскан кардаш-тувганлары акында хабарладылар.
Оннан сонъ Асият Манкаева окувшыларга согыс басланганша Караногай районыннан йыл сайын элимизге бек коьп эт эм баска азыклар йиберилетаган болганын, согыс аьдемлердинъ баьри мыратларын, яшав барысын бузганын айтты:
– Душпан Караногай районына еткен сонъ, муннан баска якларга 157 мынъ кой, 5 мынъ уьйкен мал, 3 мынъ атлар айдалынып аькетилинген. Ногай эр кисилер явга карсы турып, Элин коршалавга кеткенде, уьйде калган хатын-кызлар, картлар, балалар «Баьри зат фронт уьшин, баьри зат енъуьв уьшин» деген шакырув астында ислегенлер. Караногайда яшаган хатынлар фронтка 300 тонлар, 1500 юн шораплар, 200 боьрклер йибергенлер. Оннан оьзгелей, район яшавшылары фронтка деп миллионга ювык маьнет акша йыйнаганлар.
Ногай район Хатын-кызлар советининъ председатели Асият Манкаева бизим ногай хатынлардынъ аьр бириси оьз Элине пайдалы болмага, Енъуьвди ювыклатпага шалысканын белгиледи.
Н.Кожаева.
Суьвретте: йолыгыс барысында.
