Юма басында оьткен кезекли кенъесте Ногай район аькимбасы Мухтарбий Аджеков Ногай район ветуправление етекшиси Кельди-Мурат Шамаровты муниципалитеттинъ Сый грамотасы ман савгалады (алдын организация аьрекет сырагылары бойынша 1-нши орынды бийлегени Дагестан Оькиметининъ Сый грамотасы ман белгиленген).

Солай ок «Точка роста» косымша билимлендируьв орталыгынынъ район шахматлар лигасынынъ тренери Арслан Елакаевти эм Россия турнирлеринде шахматлар бойынша ойынларда йогары уьстинликликлерге етискен онынъ окувшылары Альмира Киреевады эм Аман Саитовты савгалады.
Балаларды савгалай берип, М.Аджеков туьрли дережели ярысларда эм олимпиадаларда ийги сырагыларга окувшылар етисетаганын айырым белгилеп, окытувшыларга эм ата-аналарга оьз разылыгын билдирди.
Ногай район администрациясындагы согыс, ис, Савытлы куьшлер эм ыхтыяр саклав органларынынъ ветеранлар советининъ председатели Акманбет Сангишиев Уллы Енъуьвдинъ 77-нши йыллыгына багысланып кезекли аьлде автоювырувга аьзирлик коьрилетаганын билдирди. Онынъ айтувы ман, бу акцияда районнынъ баьри авыллары да ортакшылаяклар. Ол, муннан 80 йыллар артта согыс урыслары болып, аьли кардашлык мезарлар орынласкан ерлерге айырым эс каратпага керегин белгиледи. Солай ок А.Сангишиев быйыл Ногай районы фашист баскыншыларыннан еримиз босатылганлы 80 йыллыгын белгилейтаганы акында толы хабарлады. Сога багысланып мектеблер окувшыларынынъ эм баьри организацияларынынъ катнасувы ман шаралар озгарылмага керекти белгиледи. Онынъ ойы ман муниципалитет етекшилиги де макул болды.
Ногай район орманлык хозяйствосынынъ етекшиси Феруза Дикинова районда Енъуьв куьнине багысланып «Эстелик бавы» акциясы озгарылатаганы акында айтты. Район аькимбасынынъ орынбасары Баймагомед Ярлыкапов, бу акция озгарувын бардырып, Ф.Капельгородский атындагы паркта да янъы тереклер шашпага тилек салды. Терекли-Мектеб авыл аькимбасы Зейдулла Аджибайрамов, ювык арада районнынъ сол орталык паркында коьлем аьдемлер катнасувы ман субботник озгарылаягын белгилеп, сол заманда паркта янъы тереклер шашпага болаягын белгиледи.