Бу йылдынъ кырк кийик айынынъ 7-нши куьниннен алып 10-ншы куьнине дейим Дагестанда «Ак турналар» деген Гамзатов куьнлери оьтееклер. «Ак турналар» деген Гамзатов куьнлерин уйгынлав Дагестаннынъ вице-премьери Анатолий Карибовтынъ етекшилиги астында каралды. «Юнеско» белгиси бойынша оьтеек амалламада йыл сайын Россиядан эм шет эллериннен коьплеген конаклар йыйыладылар. Амалламадынъ официаллык ашылувы Расул Гамзатов атындагы Махачкаладынъ 50- нши номерли орта мектебинде оьтеек. Оннан сонъ Махачкаладынъ Ленинши комсомол атындагы паркындагы совет аьскершисине салынган эстелигининъ касында шатлыклы митинги озгарылаяк. Биринши куьннен алып Гамзатов куьнлерининъ катнасувшылары XI «Ак турналар» деген автоювырувларын карамага болаяклар. Байрамга йыйылганлар Расул Гамзатов атындагы адабиат музейинде де конакта болмага амал табаяклар.

Кырк кийик айынынъ 8-инде Дагестаннынъ уллы шаирининъ тувган куьнинде конаклар онынъ сынтасына эм эстелигине гуьл байламларын салаяклар. «Россия – бизим тарихимиз» деген музейинде адабиатлык окувлары да оьтееклер. Сол куьн республикадынъ телеберуьвлери бойынша тоьгерек столларынынъ озгарылувы да коьрсетилееклер. Амалламадынъ сонъында Поэзия театрында Расул Гамзатовка багысланган Россия поэзиясынынъ кешлиги оьтеек. Байрам амалламалары бойынша йыйылганлар Гуниб, Хунзах авылларында, Дербент каласында конакта болаяклар.