Бу йылдынъ кырк кийик айынынъ 7-нши куьнинде Тарумовка авылынынъ маданият орталыгынынъ залында ерли орта мектебининъ окувшыларына деп, «Расул Гамзатовтынъ яратувшылыгы бойынша ашык дериси» шарасы уйгынланып оьтти. Шарады орталык район китапханасынынъ куллыкшысы Насипли Динисламова эм маданият орталыгынынъ куллыкшысы Елена Ремизова юриттилер. Уллы Гамзатовтынъ савлай яратувшылык йолын ашык коьрсетип, адабиат анъ дерисининъ сценарийин район орталык китапханасынынъ етекшиси Лариса Горохова аьзирлеген эди.

Деристе Расул Гамзатовтынъ поэзиясыннан шыгармаларын авылдынъ орта мектебининъ 3-нши класс окувшылары Рамазан Хапизов эм Саид Ахматилов, солай болып, Тарумов район китапханасынынъ куллыкшылары Амина Колдасова эм Валентина Бакшалиева яттан ятлав окув оьнерлиги мен окып эситтирдилер. Расул Гамзатовтынъ «Берегите детей» деген ятлавын Тарумовка авыл орта мектебининъ окувшысы Амина Магомедова да окыды. Расул Гамзатовтынъ ятлавларын авар тилинде эм оьзининъ ятлавын авар эм орыс тиллеринде Юрковка авылыннан шаир Хизри Дидойский да йыйылганларга тынълатты. А-Невская станицасыннан Лейла Кульгишиева да биринши кере сахнага Тарумовкадынъ маданият орталыгынынъ «Ритмы гор» деген балалардынъ биюв куьби мен бирге шыкты. Баска болып, окувшыларды оьз шыгувлары ман ДР ат казанган маданият куллыкшысы Жанна Алиева, «Рыбачки» деген халк фольклор коллективи, Виктория Ускова эм Светлана Уманцева солистлери, трио «Патриот», «Таловчанка» халк фольклор коллективининъ вокаллык дуэти коьнъиллерин коьтердилер. «Расул Гамзатовтынъ яратувшылыгы бойынша ашык дериси» Россия халклар маданиятынынъ Тарумовка бойынша орталыгы эм ерли орталык район китапханасынынъ куллыкшылары ман бирге аьзирленген эди.
«Гамзатов куьнлери» Тарумовка районында озгарылып барады. Мундай адабиат-анъ шарасы аьли де кайтарылып озгарылаягына эм онынъ каравшыларынынъ саны келеекте оьсеегине сенимди йоймаймыз.
Суьвретте: шарадан коьринис.