Ногай халкымыздынъ юреги буьгуьнлерде оьрде. Токио каласында озган XXXII олимпиада ойынларында эки йигитлеримиз – Альберт Батыргазиев эм Юсуп Батырмурзаев катнастылар. Коьплеген куьнлер кайбиримиз олимпиадада яслардынъ катнасувын куьн демей, туьн демей карап турдык. Бизим Дагестан еринде Бабаюрт районынынъ Геметюбе авылында Батыргазиевлердинъ аьелинде тувган ясымыз Альберт оьзининъ эрклиги мен, сулыбы ман олимпиада ойынларында катнасып, бокс бойынша олимпиада чемпионы болды. Суьйинишимиз айлак уьйкен, оьктемсиймиз, ногайдынъ атын данъклаткан Альберт Батыргазиевти халкымыздынъ баьтири деп санаймыз. Мен озган йыл Альберт пен хабарласув эткен эдим, сол заманда онынъ бас мырады олимпиада ойынлары экенин анълап, ога Кудайдан сол мыратка еткергенин тиледим. Мен ойлайман, бизим тилеклеримиз де сол енъуьвге оны аькелгендир.
Суьйинишимизди боьлисеек орынына оьзлерининъ яман юреклери мен питне яятаганлар да болмай калмады. Табылды сондай аьдемлер, бир заманнынъ бир шагында Альберт оьзин мен Дагестанга бир катыслыгым да йок деп айткан деп билип-билмей соьз эттилер. «Бир катыслыгым да йок» деген соьзлерди Альберт айтып болмайды деп ойлайман. Дагестанда тувган, ата-бабаларынынъ еринде, Ногай шоьлде эркин еллерден куьш алган йигитимиз оьзин Дагестаннынъ эм ногай халкынынъ улы деп санамай болмас. Дурыс, спорт пан ол узактагы Нижневартовск еринде 6 ясыннан алып каьр шегип баслаган, мунда ол йыл сайын сулып йыйнап, енъуьвлерге абытлаган. Сога коьре, онынъ кишкей Аталыгы Дагестан Республикасы болса да, Альберт Батыргазиев оьзин уллы Аталыгымыз – Россиядынъ увылы деп санайды. Бу ерде бир соьз де керек тувыл, Альберт ногай халкымыздынъ, Дагестаннынъ эм савлай Россиядынъ намысын коршалаган.
– Мен бу енъуьвге коьп йылдан бери келдим. Буьгуьнлерде меним алдыма салынган борышларым, мыратларым яшавга шыгарылды. Коьплеген йыллар артта мен медаль аькелермен деп соьз бергенмен. Меним Элим, куьт мени, алтын медаль бизим Аталыкка келеек! – деп айтты Альберт оьз соьйлевинде. Элимиздинъ, халкымыздынъ шынты увылы Альберт Батыргазиев дайымларга Россиядынъ тарихине кирген. Соны бир питне де, яманлыкка айтылган соьз де кирлеп болмас. Оьзин шынты ногай, дагестанлы деп санаган инсан юреги мен Альберт уьшин оьктемсийди.
Г.Бекмуратова,
Дагестан Республикасынынъ ат казанган маданият куллыкшысы, шаир.
