2023-нши йыл Расул Гамзатовтынъ йылы деп белгиленген. Быйыл биз Россиядынъ эм Дагестаннынъ уллы увылы, шаирлик патриархынынъ юзйыллыгын карсы алаякпыз. Терекли-Мектеб авылынынъ орта китапханасында Расул Гамзатовтынъ йылынынъ ашылувы шатлыклы оьтти. Шарада яратувшылык интеллигенциясынынъ, район учреждениелерининъ эм организацияларынынъ ваькиллери катнастылар. Йыйылганлардынъ арасында Терекли-Мектеб авылынынъ ясуьйкени Зубаир Аджибаев, «Ногайский район» МР аькимбасынынъ орынбасары Баймагомед Ярлыкапов, ерли уьлке танув музейининъ директоры Каирбек Бальгишиев, Орыс Географический ямагатынынъ Ногай боьлигининъ секретари Амирхан Межитов, ногай язувшылар бар эди.
Китапхана куллыкшылары шара оьткен залды шаирдинъ суьвретлер, китаплер выставкасы ман келбакландырганлар. 1983-нши йылда Расул Гамзатов Ногай районында болган, сол куьнлерди шайытлайтаган фотограф Владимир Уразакаев алган суьвретлерден галерея аьзирленген. Шарады китапханалар тармагынынъ директоры, ДР ат казанган маданият куллыкшысы Сабират Абубекерова язувшыдынъ «Меним Дагестаным» деген китаптен уьзигин мен ашты.
Оьз эскеруьвлери мен авыл яс- уьйкени З.Аджибаев, Кадриядынъ синълиси С.Язлыбаева боьлистилер. Ногай язувшылар М-А.Ханов, С.Майлыбаева, Г.Бекмуратова Расул Гамзатовтынъ ногай тилине коьширилген ятлавларын окыдылар. Солай ок шаирдинъ ятлавларына язылган йырлары бойынша «Анъды бил» конкурсы озгарылды. Йыйылганлар анъларды тек билип калмай, савлай дуныяга белгили йырларды косылып йырладылар. Аьр бир соьйлеген аьдем Расул Гамзатовты бек ийги, аьдемшилиги бар, керексингенди анълап та, тынълап та, коьмек те этип болган инсан эди деп эслерине алдылар, онынъ шыгармалары акында айттылар. Маскарашыл экенин де айттылар, сондай уллы аьдемнинъ баьриси мен де тенъдей болып соьйлейтаган эди деп белгиледилер.
Расул Гамзатовтынъ акында саьатлеп соьйлемеге болады, соьйтип, бу йолыгыста да шаир акында коьп йылы соьзлер айтылды. Заман кайтип кеткенин де билмедик. Софья Уразбай кызы шаир Кадрияды атасындай болып, коршалайтаганын эсине алды. Салимет Майлыбаева «Горянка» лицейде окыган заманда Расул Гамзатов эм Кадрия ман йолыгыс болганын айтты. Сонъында уллы шаир Салимет Майлыбаевады Язувшылар союзына алган. Белки, биринши йолыгыс кишкей кыздынъ юрегине шаирликке йол ашкандыр. Амирхан Межитов Расул Гамзатовтынъ «Горянка» поэмасын оьзи кайтип анълайтаганын айтты. Эгер мен, бала заманымда сол шыгармады окып, Асият уьшин кыйналган болсам, Амирхан Зейнадин увылы ата орынына оьзин салып, оны баска, янъы яктан бизге ашты. Сондай эскеруьвлер, ойлар коьп айтылды.
Расул Гамзатовтынъ шаирлиги баьримизге де ювык, онынъ ятлавларын, йырларын баьриси де биледилер. Коьп ятлавлар окылды шарада. Ана, суьйим, Аталык акында ятлавлар окылды. Шумлелик авылынынъ китапхана куллыкшысы Раисат Абдулкадырова Расул Гамзатовтынъ ятлавын даргин тилинде окыды. Мага Билимлендируьв управлениесининъ етекшиси Алтын Агаспаровадынъ шаирдинъ «Посредственность» деген ятлавын окыганы ярады. Шаирдинъ тоьгеректеги затларды кайтип юрегине алып, яны авырганы аьр бир сыдырада сезиледи. Шаир кызымыз Кадриядынъ йиени Камилла Язлыбаева Расул Гамзатовтынъ «Кадрия» деген ятлавын окыды.
Расул Гамзатовтынъ йылы Ногай районында сондай кызыклы шара ман ашылды.
Г.Бекмуратова
Суьвретте: шарадан коьринис.