Белгили ногай язувшысы Фазиль Апасович Абдулжалиловтынъ 110 йыллыгына багысланган шаралар мектеблерде, китапханаларда уйгынланып озгарылдылар. Солай болып, Карашай-Шеркеш Патшалык университетининъ китапханасында ногай адабиатынынъ негизин салувшыларынынъ бириси, ногай язувшысы Фазиль Апасович Абдулжалиловтынъ 110 йыллыгына багысланып, «Меним ойларым эм кайгым – халк акында» деген окув конференциясы уйгынланып оьтти. Шарада карашай-балкар эм ногай филология кафедрасынынъ куллыкшылары, студентлер, Ногай драма театрынынъ артистлери ортакшылык эттилер. Кешликтинъ уйгынлавшыларын эм конакларын, ана тилинде озгарылатаган шаралардынъ маьнелигин белгилеп, КЧГПУ ректоры Т.Узденов йылы йолыкты. Шарада кафедра етекшиси, профессор, филология илмилерининъ докторы Т.Алиева эм профессор, филология илмилерининъ докторы Н.Суюнова шыгып соьйледилер. Фазиль Абдулжалиловтынъ яшав йолы акында докладлар ман Карашай-Шеркеш гуманитарлык тергев институтынынъ куллыкшылары «Фазиль Абдулжалилов: яшав эм бакты» деген китабининъ авторы Ш.Курмангулова эм Сафият Кукаева шыгып соьйледилер. Фазиль Абдулжалилов «Коьплерден экев», «Куьшлилердинъ аьели», «Асантай», «Енъилген явлар» пьесасы, «Меним йырым – Кобансув», «Калем колга туьскенде» эм сондай баска ятлавлар йыйынтыкларынынъ авторы болады.
Шара юритуьвшиси Насипхан Суюнова Ф.Абдулжалиловтынъ яратувшылыгын билгенлерге викторина да озгарды. Белгили ногай язувшыдынъ шыгармаларыннан уьзикти, ятлавларды, докладларды студентлер шыгып айттылар. Шара катнасувшылары ногай тилининъ яйылмага эм сакланмага кереги акында да айтып кеттилер. «Ногай Эл» ямагат организациясынынъ етекшиси эм Ногай патшалык драма театрынынъ етекшиси Валерий Казаков, ногай тили Карашай-Шеркеш эм Дагестан Республикаларында да патшалык тили болып келуьвине да карамастан, тилдинъ йойылып барувы акында да айтты. Валерий Сеперович кишкей балалар несили ана тилинде соьйлемейтаганын да айтып кетти. Ясларды тувган ногай тилин оьрлендируьвде косымын этпеге шакырды. Кешлик Ногай драма театрынынъ артистлерининъ эм Карашай-Шеркеш Республикасынынъ ат казанган артисти Лейла Гаугадынъ коьрсетуьви мен тамамланды. Шарада Ф.Абдулжалиловтынъ соьзлерине язылган йырлар да занъырадылар.
Суьвретте: шара озатаган шагында.