Телевидение аьр бир аьдемнинъ яшавынынъ айырылгысыз кесеги болады. Ол аьр от ягада билдируьвлерди еткеруьвдинъ, юбантувдынъ эм аьдемди савлай дуныя ман «байланыстырувдынъ» амалы демеге болаяк. Телевидение аркалы дуныяда болатаган ислер мен, туьрли янъылыклар ман, коьрсетуьвлер мен танысамыз.
19-ншы январьде «Россия» ВГТРК-сынынъ «Карашай-Шеркеш» филиалы оьзининъ «тувган куьнин» белгиледи. 29 йыл артта уйгынланган республикалык телевидениединъ дикторлары, журналистлери, аьр бир аьелдинъ суьйикли конаклары болып, кызыклы коьрсетуьвлери мен, юртымызда болатаган ислер акында янъылыклары ман яшавшыларды кувандырып турадылар. «Карашай-Шеркеш» ГТРК-да уйгынланган шагыннан алып уста журналистлер несиллери ислеп келеятырлар. Орыс эм миллет тиллеринде уйгынланатаган коьрсетуьвлери мен олар каравшылардынъ коьнъиллерине етпеге шалысадылар. Телевидениединъ куьнине багысланып, ГТРК-да байрам шарасы озды. Онда телекомпаниядынъ ийги куллыкшылары Сый грамоталар ман савгаландылар. Телевидениединъ ногай редакциясында коьп йыллардынъ бойында белгили журналист, Карашай-Шеркеш Республикасынынъ халк шаири Фарида Сидахметова (Зарманбетова) ислеп келеятыр. Сол куьн онынъ исине де йогары белги берилди – сыйлы мерекеси мен байланыста эм коьпйыллык намыслы иси, йогары кеспилилиги уьшин ВГТРК-дынъ «Карашай-Шеркеш» филиалынынъ басшысынынъ атыннан Сый грамотага тийисли этилди.
– Журналистлик куллыгымды мен бек суьемен. 1988-нши йылда Карашай-Шеркеш область радиокомитетине куллык этпеге келдим. Ногай тилинде язув усталыгына меним насихатшым Баьтир Магомет увылы Баисов уьйретти. 1993-нши йылда республикамызда телевидение ашылганда, мени радиодан сонда коьширеек болдылар, ама кызым Фирангиз янъы тувган себепли, мен онда баралмадым. Тек керек заманда айырым коьрсетуьвлер аьзирлемеге болатаган эдим. Радио ман телевидение меним яшавымда бирге коьп йылларды бардылар. 2002-нши йылдан алып 2008-нши йылга дейим «Экран» студиясында куллык эттим. Онда тележурналистика сырларына онынъ басшысы С.Б.Шендрик уьйретти. Орыс тилинде доьрт айырым коьрсетуьвди оьзим юргистетаган эдим. Мунда ислеп баслаган шагымда мен Россияда биринши болып «Адмирал Колчак» деген фильмди аьзирледим, неге десе Колчактынъ ногай тамырлары болганлар. Онынъ акында коьп тарих материалларды йыйдым. Кисловодск каласында «Благодать» деп аталган музейде ога багысланган айырым боьлик бар. Сол коьрсетуьвди аьзирлегеним уьшин оьктемлимен. 2008-нши йылда мени ГТРК-га шакырдылар. Сол заманнан алып ногай боьлигинде ислеймен, – деп хабарлайды оьзининъ куллыгы акында Фарида.
– Мен, коьбисинше аьлде, адабиат, маданият, саният акында коьрсетуьвлерди аьзирлемеге суьемен. Ама бизим журналистлик куллыгымыз бек кенъ, сонынъ уьшин авыл хозяйство темасына, туьрли маьселелер акында да язбага керек болады.
Ф.Сидахметовадынъ тележурналистикада бай сулыбы бар. Оны тек республикамызда тувыл, Дагестанда, ногай халкы яшайтаган баьри регионларда аьруьв биледилер, шаирлигин йогары баалайдылар.
Биз калемдасымызды кеспилик байрамы ман эм оьрметли савгасы ман ак юректен кутлаймыз, ога яратувшылыгында тагы да коьп йогары етимислерди сагынамыз.
К.Найманова-Добагова. Суьвретте: Ф.Сидахметовады (Зарманбетова) «Карашай-Шеркеш» ГТРК-сынынъ басшысы С.Казиева савгалав мезгилиннен.
